ಸ್ಫೋಟ ಪ್ರಕರಣದಲ್ಲಿ ಸಮದ್ ಬಂಧನ; ತನ್ನ ಮಗ ಅಮಾಯಕ: ಬೀಬಿ ರಿಹಾನ ಹೇಳಿಕೆ

ಭಟ್ಕಳ, ಮೇ 25: ಪುಣೆ ಜರ್ಮನ್ ಬೇಕರಿ ಸ್ಫೋಟದಲ್ಲಿ ಭಾಗಿಯಾಗಿದ್ದಾನೆ ಎಂಬ ಆರೋಪದಲ್ಲಿ ಬಂಧಿತನಾಗಿರುವ ಅಬ್ದುಲ್ ಸಮದ್ ಭಟ್ಕಳ್ ಅಮಾಯಕನಾಗಿದ್ದು, ಪೊಲೀಸರು ಹೇಳುತ್ತಿರುವುದು ಕಟ್ಟುಕತೆ ಎಂದು ಆತನ ತಾಯಿ ಬೀಬಿ ರಿಹಾನ ಆರೋಪಿಸಿದ್ದಾರೆ.

ಇಂದು ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಜರ್ಮನ್ ಬೇಕರಿ ಸ್ಫೋಟ ಪ್ರಕರಣದ ಆರೋಪಿ ಎಂದು ಹೇಳಲಾಗುತ್ತಿರುವ ರಿಯಾಝ್ ಭಟ್ಕಳ್ ಹಾಗೂ ಇಕ್ಬಾಲ್ ಭಟ್ಕಳ್ರೊಂದಿಗೆ ತನ್ನ ದೊಡ್ಡ ಮಗ ಮುಹಮ್ಮದ್ ಅಹ್ಮದ್ ಪರಿಚಯ ಹೊಂದಿದ್ದಾನೆ ಎಂಬ ಕಾರಣಕ್ಕೆ ನಮ್ಮ ಕುಟುಂಬದವರಿಗೆ ಪೊಲೀಸರು ಕಿರುಕುಳ ನೀಡುತ್ತಿದ್ದಾರೆ ಎಂದು ಆರೋಪಿಸಿದರು.

ಮುಹಮ್ಮದ್ ಯಾಸೀನ್(ಅಹ್ಮದ್ ಯಾಸೀನ್) 5 ವರ್ಷಗಳ ಹಿಂದೆ ಆತನ ತಂದೆ ಝರ್ರಾನ್ ಸಿದ್ದಬಾಪರೊಂದಿಗೆ ಜಗಳ ಮಾಡಿ ಮನೆಯಿಂದ ತೆರಳಿದವ ಅನಂತರ ತಾನು ದುಬೈಯಲ್ಲಿರುವುದಾಗಿ ಮನೆಗೆ ಫೋನ್ ಮೂಲಕ ತಿಳಿಸಿದ್ದ. ಬಳಿಕ ಆತ ಸ್ಫೋಟ ಪ್ರಕರಣದಲ್ಲಿ ಭಾಗಿಯಾಗಿದ್ದಾನೆ ಎಂದು ಆರೋಪಿಸಿ ಪೊಲೀಸರು ನಮಗೆ ತನಿಖೆಯ ನೆಪದಲ್ಲಿ ನಿರಂತರ ಕಿರುಕುಳ ನೀಡುತ್ತಿದ್ದರು. ಈಗ ಅದರ ಮುಂದುವರಿದ ಭಾಗವಾಗಿ ತನ್ನ ಅಮಾಯಕ ಮಗನನ್ನು ಪೊಲೀಸರು ಬಂಧಿಸಿದ್ದಾರೆ.

ಕಳೆದ ಮೂರು ತಿಂಗಳ ಹಿಂದೆ ವಿಸಿಟಿಂಗ್ ವೀಸಾದಲ್ಲಿ ಅಬ್ದುಲ್ ಸಮದ್ ದುಬೈಗೆ ತೆರಳಿದ್ದು, ವೀಸಾ ಮುಗಿದ ಬಳಿಕ ಮನೆಗೆ ಬರುತ್ತಿದ್ದ ವೇಳೆ ಆತನನ್ನು ಪೊಲೀಸರು ಸುಳ್ಳು ಆರೋಪದಡಿ ಬಂಧಿಸಿದ್ದಾರೆ. ಆತ ಈ ಹಿಂದೆ ವ್ಯಾಸಂಗಕ್ಕಾಗಿ ಬೆಂಗಳೂರಿಗೆ ತೆರಲಿದ್ದು ಬಿಟ್ಟರೆ ಬೇರೆಲ್ಲಿಗೂ ಹೋಗಿಲ್ಲ. ಆದರೆ ಪೊಲೀಸರು ಬೆಂಗಳೂರಿನಲ್ಲಿಯೂ ಹಲವು ಬಾರಿ ಆತನನ್ನು ವಿಚಾರಣೆಗೆ ವಶಕ್ಕೆ ತೆಗೆದುಕೊಂಡಿದ್ದರು. ಬಳಿಕ ಆತ ಅಮಾಯಕ ಎಂದು ತಿಳಿದು ಬಿಡುಗಡೆ ಗೊಳಿಸಿದ್ದರು. ಅಲ್ಲದೆ ದುಬೈಗೆ ತೆರಳುವಾಗಲು ಪೊಲೀಸರಿಗೆ ಆತ ಮಾಹಿತಿ ನೀಡಿದ್ದ ಎಂದು ರಿಹಾನ ತಿಳಿಸಿದ್ದಾರೆ.

ಪೊಲೀಸರಿಗೆ ಮುಹಮ್ಮದ್ ಯಾಸೀನ್ ಕುರಿತ ಸಮಗ್ರವಾದ ಮಾಹಿತಿಯನ್ನು ನಾವು ಈ ಹಿಂದೆ ಕೂಡಾ ನೀಡಿದ್ದೇವೆ. ನಮ್ಮನ್ನು ಹಲವು ಬಾರಿ ಈ ಬಗ್ಗೆ ಪೊಲೀಸರು ವಿಚಾರಣೆ ಕೂಡಾ ನಡೆಸಿದ್ದಾರೆ ಎಂದು ಅವರು ತಿಳಿಸಿದರು.
ಈಗ ಸಮದ್ನನ್ನು ಪೊಲೀಸರು ಬಂಧಿಸಿರುವುದು ಅಕ್ರಮವಾಗಿದ್ದು, ಆತ ಅಮಾಯಕ. ಆತನ ಮೇಲಿರುವ ಆರೋಪ ಕೂಡಾ ಸುಳ್ಳು ಎಂದು ಅವರು ಹೇಳಿದರು. ಸುದ್ದಿಗೋಷ್ಠಿಯಲ್ಲಿ ಅಬ್ದುಲ್ ಸಮದ್ನ ಚಿಕ್ಕಪ್ಪರಾದ ಮುಹಮ್ಮದ್ ಅಲಿ ಹಾಗೂ ಯಾಕೂಬ್ ಉಪಸ್ಥಿತರಿದ್ದರು.