ಪಾಕಿಸ್ತಾನ: 26/11ರ ದಾಳಿ ಪ್ರಕರಣ ಹಫೀಝ್ ಬಂಧನಕ್ಕೆ ಸುಪ್ರೀಂ ಕೋರ್ಟ್ ನಕಾರ

ಇಸ್ಲಾಮಾಬಾದ್, ಮೇ 25: ಮುಂಬೈಯಲ್ಲಿ ನಡೆದ 26/11ರ ದಾಳಿ ಪ್ರಕರಣದ ರೂವಾರಿ ಎಂದು ಆರೋಪಿಸಲಾಗಿರುವ ಜಮಾತುದ್ದಾವಾದ ಮುಖ್ಯಸ್ಥ ಹಫೀಝ್ ಮುಹಮ್ಮದ್ ಸಯೀದ್‌ರ ಬಿಡುಗಡೆಯನ್ನು ವಿರೋಧಿಸಿ ಅಧಿಕಾರಿಗಳು ಸಲ್ಲಿಸಿದ ಮನವಿಯನ್ನು ಪಾಕಿಸ್ತಾನದ ಸರ್ವೋಚ್ಚ ನ್ಯಾಯಾಲಯವು ತಳ್ಳಿ ಹಾಕಿದೆ. ಆರೋಪಿಯು ಪ್ರಕರಣದಲ್ಲಿ ಭಾಗಿಯಾಗಿರುವ ಬಗ್ಗೆ ಯಾವುದೇ ಸಾಕ್ಷಾಧಾರಗಳು ಲಭ್ಯವಿಲ್ಲ ಎಂದು ಅದು ತಿಳಿಸಿದೆ.

ಸಯೀದ್‌ರ ಬಿಡುಗಡೆ ಕುರಿತಂತೆ ಲಾಹೋರ್ ಹೈಕೋರ್ಟ್ ನೀಡಿದ ಆದೇಶದ ವಿರುದ್ಧ ಪಾಕಿಸ್ತಾನದ ಕೇಂದ್ರ ಹಾಗೂ ಪ್ರಾಂತೀಯ ಸರಕಾರಗಳು ಕಳೆದ ವರ್ಷ ಅಪೆಕ್ಸ್ ನ್ಯಾಯಾಲಯದಲ್ಲಿ ಮೇಲ್ಮನವಿ ಸಲ್ಲಿಸಿದ್ದವು. ಆದರೆ ಕೆಲವು ತಾಂತ್ರಿಕ ಕಾರಣಗಳಿಂದ ವಿಚಾರಣೆೆ ನಡೆಸುವಲ್ಲಿ ವಿಳಂಬವಾಯಿತು ಎಂದು ನ್ಯಾಯಾಲಯ ತಿಳಿಸಿದೆ.

ಸಯೀದ್ ಪ್ರಕರಣ ಇಂದು ವಿಚಾರಣೆಗೆ ಬಂದಿದ್ದು, ನ್ಯಾಯಮೂರ್ತಿ ನಾಸಿರ್ ಉಲ್ ಮುಲ್ಕ್ ನೇತೃತ್ವದ ಮೂವರು ನ್ಯಾಯಾಧೀಶರನ್ನೊಳಗೊಂಡ ನ್ಯಾಯಪೀಠ ಸರಕಾರದ ಮನವಿಗಳನ್ನು ತಳ್ಳಿಹಾಕಿದೆ. ಹೆಚ್ಚಿನ ವಿವರಗಳು ತಕ್ಷಣಕ್ಕೆ ಲಭ್ಯವಾಗಿಲ್ಲ ಎಂದು ಮೂಲಗಳು ತಿಳಿಸಿವೆ.

ಮುಂಬೈಯಲ್ಲಿ ನಡೆದ ದಾಳಿಯ ಬಳಿಕ ಜಮಾತುದ್ದವಾ ಲಷ್ಕರೆ ತಯ್ಯಿಬದ ಮುಖವಾಡವಾಗಿದೆಯೆಂಬ ವಿಶ್ವಸಂಸ್ಥೆಯ ಭದ್ರತಾ ಸಮಿತಿ ಹೇಳಿಕೆಯೊಂದನ್ನು ಪ್ರಕಟಿಸಿದುದರಿಂದ ನಿಷೇಧಿತ ಸಂಘಟನೆಯಾದ ಲಷ್ಕರೆ ತಯ್ಯಿಬದ ಸಂಸ್ಥಾಪಕರೆಂದು ಹೇಳಲಾಗಿರುವ ಹಫೀಝ್ ಸಯೀದ್ 2008ರ ಡಿಸೆಂಬರ್‌ನಿಂದ ಗೃಹಬಂಧನದಲ್ಲಿದ್ದರು.

ಹಫೀಝ್ ಸಯೀದ್, ತನ್ನ ಗೃಹಬಂಧನವನ್ನು ವಿರೋಧಿಸಿ ಲಾಹೋರ್ ಹೈಕೋರ್ಟ್‌ನಲ್ಲಿ ಪ್ರಕರಣ ದಾಖಲಿಸಿದ್ದರು. ಕೇಂದ್ರ ಹಾಗೂ ಪ್ರಾಂತೀಯ ಸರಕಾರಗಳು ಆರೋಪಿಯನ್ನು ಬಂಧನದಲ್ಲಿಡಲು ಅಗತ್ಯವಾದ ಸಾಕ್ಷಾಧಾರಗಳನ್ನು ಒದಗಿಸಲು ವಿಫಲವಾದುದರಿಂದ, ಹೈಕೋರ್ಟ್‌ನ ತ್ರಿಸದಸ್ಯರ ಪೀಠವು ಸಯೀದ್‌ರನ್ನು ಕಳೆದ ವರ್ಷದ ಜೂನ್ 2ರಂದು ಖುಲಾಸೆಗೊಳಿಸಿತ್ತು. ಭಾರತ ಹಾಗೂ ಅಂತಾರಾಷ್ಟ್ರೀಯ ಸಮುದಾಯಗಳ ಒತ್ತಡದಿಂದಾಗಿ ಪಾಕ್‌ನ ಕೇಂದ್ರ ಹಾಗೂ ಪ್ರಾಂತೀಯ ಸರಕಾರಗಳು ಲಾಹೋರ್ ಹೈಕೋರ್ಟ್‌ನ ತೀರ್ಪಿನ ವಿರುದ್ಧ ಸವೋಚ್ಚ ನ್ಯಾಯಾಲಯಕ್ಕೆ ಮೇಲ್ಮನವಿ ಸಲ್ಲಿಸಿದ್ದವು.

ಭಾರತದ ಅಸಮಾಧಾನ
ಮುಂಬೈ ದಾಳಿಯ ಶಂಕಿತ ರೂವಾರಿ ಜಮಾತುದ್ದಾವಾದ ಮುಖ್ಯಸ್ಥ ಹಫೀಝ್ ಸಯೀದ್‌ರ ಬಿಡುಗಡೆಯನ್ನು ಪ್ರಶ್ನಿಸಿ ಪಾಕ್ ಸರಕಾರ ಸಲ್ಲಿಸಿದ್ದ ಅರ್ಜಿಗಳನ್ನು ತಳ್ಳಿಹಾಕಿದ ಪಾಕಿಸ್ತಾನದ ಸರ್ವೋಚ್ಚ ನ್ಯಾಯಾಲಯದ ತೀರ್ಪಿಗೆ ಭಾರತ ತನ್ನ ಅಸಮಾಧಾನ ವ್ಯಕ್ತಪಡಿಸಿದೆ.

ತನ್ನ ಆತಂಕಗಳನ್ನು ನಿವಾರಿಸುವ ನಿಟ್ಟಿನಲ್ಲಿ ಪಾಕಿಸ್ತಾನವು ಅರ್ಥಪೂರ್ಣ ಕ್ರಮಗಳನ್ನು ಕೈಗೊಳ್ಳುವ ನಿರೀಕ್ಷೆಯನ್ನು ತಾನು ಹೊಂದಿರುವುದಾಗಿ ಭಾರತ ಅಭಿಪ್ರಾಯ ವ್ಯಕ್ತಪಡಿಸಿದೆ. ‘‘ತೀರ್ಪಿನಿಂದಾಗಿ ಒಂದು ರೀತಿಯ ಅಸಮಾಧಾನದ ಭಾವನೆ ಉಂಟಾಗಿದೆ. ಮುಂಬೈ ಭಯೋತ್ಪಾದಕ ದಾಳಿಯ ರೂವಾರಿ ಎಂದು ನಾವು ಹಫೀಝ್ ಕುರಿತು ಪ್ರಸ್ತಾಪಿಸಿರುವಾಗ ರಾಷ್ಟ್ರದ ಪ್ರತಿಯೊಬ್ಬರೂ ಈ ನಿಲುವಿನ ಕುರಿತು ಅಸಮಾಧಾನ ಹೊಂದಿದ್ದಾರೆ’’ ಎಂದು ಭಾರತದ ವಿದೇಶಾಂಗ ಕಾರ್ಯದರ್ಶಿ ನಿರುಪಮಾ ರಾವ್ ಹೊಸದಿಲ್ಲಿಯಲ್ಲಿ ತಿಳಿಸಿದ್ದಾರೆ.