ನಿತ್ಯಾನಂದ ಪ್ರಕರಣ: ವಿಚಾರಣೆ ಇಂದು

ಬೆಂಗಳೂರು, ಮೇ 25: ಲೈಂಗಿಕ ಹಗರಣದ ಆರೋಪಿ ನಿತ್ಯಾನಂದ ಸ್ವಾಮಿಯ ಜಾಮೀನು ಹಾಗೂ ಇತರ ಎರಡು ಅರ್ಜಿಗಳ ವಿಚಾರಣೆಯನ್ನು ಹೈಕೋರ್ಟ್ ಮೇ 26ಕ್ಕೆ ಮುಂದೂಡಿದೆ.

ನಿತ್ಯಾನಂದ ಪರ ಸಲ್ಲಿಸಲಾಗಿರುವ ಅರ್ಜಿ ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ಸುಭಾಷ್ ಬಿ.ಅಡಿ ಈ ಆದೇಶ ಹೊರಡಿಸಿದ್ದಾರೆ.

ರಾಸಲೀಲೆ ಸಂಬಂಧ ತನಿಖೆ ಆರಂಭಿಸಿದ ಸಿಐಡಿ ತನಿಖಾಧಿಕಾರಿಗಳು ಸ್ವಾಮೀಜಿಯ ಬ್ಯಾಂಕ್ ಖಾತೆ ಹಾಗೂ ಮಠಕ್ಕೆ ಸೇರಿದ ಕೆಲವು ವಸ್ತುಗಳನ್ನು ಮುಟ್ಟುಗೋಲು ಹಾಕಿಕೊಂಡಿದ್ದಾರೆ.

ಅದನ್ನು ತೆರವುಗೊಳಿಸಬೇಕು ಎಂದು ಕೆಲವು ಟ್ರಸ್ಟ್‌ಗಳು ಅರ್ಜಿ ಸಲ್ಲಿಸಿವೆ. ಇದರೊಂದಿಗೆ ನಿತ್ಯಾನಂದ ಸಲ್ಲಿಸಿರುವ ಜಾಮೀನು ಅರ್ಜಿ ವಿಚಾರಣೆ ಕೂಡ ಮುಂದೂಡಲಾಗಿದೆ.