ಬೆಂಗಳೂರು, ಮೇ 25: ಹಾಲಪ್ಪ ಪ್ರಕರಣಕ್ಕೆ ಸಂಬಂಧಿಸಿದಂತೆ ಸಿಐಡಿ ಪೊಲೀಸರು ಕಲೆ ಹಾಕಿರುವ ಸಾಕ್ಷಾಧಾರಗಳಿಂದ ಅತ್ಯಾಚಾರ ಪ್ರಕರಣ ಎಂದು ಮೇಲ್ನೋಟಕ್ಕೆ ಕಂಡುಬರುವ ಹಿನ್ನೆಲೆಯಲ್ಲಿ ಆರೋಪಿಯ ಡಿಎನ್‌ಎ ಪರೀಕ್ಷೆ ಯಾಕೆಬೇಕು ಎಂದು ಹೈಕೋರ್ಟ್ ಪ್ರಶ್ನಿಸಿದೆ.
ಪ್ರಕರಣಕ್ಕೆ ಸಂಬಂಧಿಸಿದಂತೆ ಡಿಎನ್‌ಎ ಪರೀಕ್ಷೆಗೆ ಅನುಮತಿ ನೀಡಿ ಶಿವಮೊಗ್ಗ ಮೂರನೆ ಜೆಎಂಎಫ್‌ಸಿ ನ್ಯಾಯಾಲಯ ಹೊರಡಿಸಿದ್ದ ಆದೇಶವನ್ನು ಪ್ರಶ್ನಿಸಿ ಹಾಲಪ್ಪ ಪರ ವಕೀಲರು ಸಲ್ಲಿಸಿದ್ದ ಮೇಲ್ಮನವಿ ಅರ್ಜಿ ವಿಚಾರಣೆ ನಡೆಸಿದ ನ್ಯಾ. ಸಿ.ಆರ್.ಕುಮಾರಸ್ವಾಮಿ ಅವರು, ಡಿಎನ್‌ಎ ಪರೀಕ್ಷೆ ಯಾಕೆ ಬೇಕು ಎಂಬ ಬಗ್ಗೆ ವಿವರಣೆ ಸಲ್ಲಿಸುವಂತೆ ಸರಕಾರಿ ವಕೀಲರಿಗೆ ಆದೇಶ ನೀಡಿದರು.
ಹಾಲಪ್ಪರ ಡಿಎನ್‌ಎ ಪರೀಕ್ಷೆಗೆ ಶಿವಮೊಗ್ಗ ನ್ಯಾಯಾಲಯ ಅನುಮತಿ ನೀಡಿರುವುದನ್ನು ಅರ್ಜಿಯಲ್ಲಿ ಪ್ರಶ್ನಿಸಲಾಗಿದೆ. ಅಲ್ಲದೆ ಈ ಹಂತದಲ್ಲಿ ಪರೀಕ್ಷೆಯ ಅವಶ್ಯಕತೆ ಇಲ್ಲ. ಪ್ರಕರಣಕ್ಕೆ ಸಂಬಂಧಿಸಿದಂತೆ ಪೊಲೀಸರು ವಶಪಡಿಸಿಕೊಂಡಿರುವ ಬಟ್ಟೆಗಳ ಮೇಲಿರುವ ಕಲೆ ರಕ್ತದ್ದೊ ಅಥವಾ ಬೇರೆಯದ್ದೊ.
ಅದು ರಕ್ತದ ಕಲೆಗಳಾಗಿದ್ದರೆ ಯಾರ ರಕ್ತದ ಕಲೆಗಳು ಎನ್ನುವುದು ಇನ್ನೂ ದಢಪಟ್ಟಿಲ್ಲ. ಅದನ್ನು ದಢಪಡಿಸುವ ಮೊದಲು ಡಿಎನ್‌ಎ ಪರೀಕ್ಷೆ ಸಮಂಜಸವಲ್ಲ ಎಂದು ಅರ್ಜಿಯಲ್ಲಿ ವಾದಿಸಲಾಗಿದೆ.
ಈಗಾಗಲೇ ಅರ್ಜಿದಾರರು ನ್ಯಾಯಾಂಗ ಬಂಧನಕ್ಕೆ ಒಳಗಾಗಿ ಆಸ್ಪತ್ರೆಯಲ್ಲಿದ್ದಾರೆ. ಹೀಗಾಗಿ ಯಾವುದೇ ಸಂದರ್ಭದಲ್ಲಿ ಆರೋಪಿಯ ರಕ್ತಪಡೆಯುವ ಸಂಭವವಿದೆ.
ಆದ್ದರಿಂದ ರಕ್ತ ತೆಗೆಯದಂತೆ ಹೈಕೋರ್ಟ್ ಸರಕಾರಕ್ಕೆ ಕಟ್ಟು ನಿಟ್ಟಿನ ಆದೇಶ ನೀಡಬೇಕು ಎಂದು ಅರ್ಜಿದಾರರ ಪರ ವಕೀಲರು ಮನವಿ ಮಾಡಿದರು.
ಈ ಹಿನ್ನೆಲೆಯಲ್ಲಿ ಡಿಎನ್‌ಎ ಪರೀಕ್ಷೆಯ ಅಗತ್ಯತೆಯ ಬಗ್ಗೆ ವಿವರಣೆ ನೀಡುವಂತೆ ಸರಕಾರಿ ವಕೀಲರಿಗೆ ಆದೇಶಿಸಿ ವಿಚಾರಣೆಯನ್ನು ಬುಧವಾರ ಮೇ 26ಕ್ಕೆ ಮುಂದೂಡಿದರು.
Subscribe to:
Post Comments (Atom)
No comments:
Post a Comment