ಶೈಕ್ಷಣಿಕವಾಗಿ ಮುಸ್ಲಿಮರು ಅತ್ಯಂತ ಹಿಂದುಳಿದ ಸಮುದಾಯ: ವರದಿ

ಹೊಸದಿಲ್ಲಿ, ಮೇ 25: ಮುಸ್ಲಿಮ್ ಸಮುದಾಯವು ದೇಶದಲ್ಲಿ ಶೈಕ್ಷಣಿಕವಾಗಿ ತೀರಾ ಹಿಂದುಳಿದಿರುವ ಸಮುದಾಯ ಎಂದು ಕೇಂದ್ರ ಸರಕಾರ ನಿಯೋಜಿತ ರಾಷ್ಟ್ರೀಯ ಮಾದರಿ ಸಮೀಕ್ಷಾ ಸಂಸ್ಥೆ (ಎನ್‌ಎಸ್‌ಎಸ್‌ಒ)ಯು ದೃಢ ಪಡಿಸಿದೆ. ಉನ್ನತ ಶಿಕ್ಷಣಗಳಲ್ಲಿ ಮುಸ್ಲಿಮರ ಪ್ರಾತಿನಿಧ್ಯವು ಅತ್ಯಂತ ಹಿಂದುಳಿದ ವರ್ಗವೆಂದು ಗುರುತಿಸಲ್ಪಟ್ಟಿರುವ ಪರಿಶಿಷ್ಟ ಪಂಗಡಕ್ಕಿಂತಲೂ ಕಡಿಮೆಯಿದೆ ಎಂದು ಸಮಿತಿಯ ವರದಿಯಲ್ಲಿ ತಿಳಿಸಲಾಗಿದೆ.

ಕೇಂದ್ರ ಅಂಕಿ ಅಂಶಗಳು ಮತ್ತು ಕಾರ್ಯಕ್ರಮ ಜಾರಿ ಸಚಿವಾಲಯಕ್ಕೆ ಸಲ್ಲಿಸಲಾಗಿರುವ ಎನ್‌ಎಸ್‌ಎಸ್‌ಒದ ‘‘ಭಾರತದಲ್ಲಿ ಶಿಕ್ಷಣ 2007-08: ಪಾಲ್ಗೊಳ್ಳುವಿಕೆ ಮತ್ತು ವೆಚ್ಚ’’ ಎಂಬ ವರದಿಯಲ್ಲಿ ಈ ವಿಷಯವನ್ನು ಬಹಿರಂಗ ಪಡಿಸಲಾಗಿದೆ.

ಶಿಕ್ಷಣ ಪಡೆಯುತ್ತಿರುವ 100 ಮಂದಿಯಲ್ಲಿ ಶೇ. 10 ಮುಸ್ಲಿಮರು ಮಾತ್ರ ಹೈಸ್ಕೂಲ್ ಮತ್ತು ಅದಕ್ಕಿಂತ ಹೆಚ್ಚಿನ ಶಿಕ್ಷಣಕ್ಕೆ ದಾಖಲಾಗಿದ್ದಾರೆ. ಈ ಪ್ರಮಾಣವು ಪರಿಶಿಷ್ಟ ಜಾತಿಯವರಲ್ಲಿ ಶೇ. 12, ಪರಿಶಿಷ್ಟ ಪಂಗಡಗಳಲ್ಲಿ ಶೇ. 11 ಮತ್ತು ಇತರ ಹಿಂದುಳಿದ ಜಾತಿಗಳಲ್ಲಿ ಶೇ. 14ರಷ್ಟಿದೆ.

‘‘ದೇಶದಲ್ಲಿ ಶೈಕ್ಷಣಿಕವಾಗಿ ಮುಸ್ಲಿಮರು ಅತಿ ಹಿಂದುಳಿದ ವರ್ಗಗಳು ಎಂಬುದು ಬಹಿರಂಗ ಸತ್ಯವಾಗಿದೆ’’ ಎಂದು ಲೋಕ್ ಪರಿಷತ್ ಎನ್‌ಜಿಒದ ಕಾರ್ಯಕರ್ತ ಅರ್ಷದ್ ಅಜ್ಮಲ್ ಹೇಳುತ್ತಾರೆ. ಉನ್ನತ ಶಿಕ್ಷಣದಲ್ಲಿ ನಗರ ಪ್ರದೇಶದ ಮುಸ್ಲಿಮರು ಗ್ರಾಮೀಣ ಪ್ರದೇಶದ ಮುಸ್ಲಿಮರಿಗಿಂತಲೂ ಹಿಂದುಳಿದಿದ್ದಾರೆ.

ನಗರದಲ್ಲಿ ಬಡ ಮುಸ್ಲಿಮರಿಗೆ ಶಿಕ್ಷಣ ಪಡೆಯುವುದು ದುಬಾರಿಯಾಗಿದೆ. ಭೂ ರಹಿತ ಬಡವರು, ಕಾರ್ಮಿಕರು, ರಿಕ್ಷಾ ತಳ್ಳುವವರು ಮುಂತಾದ ಬಡವರು ತಮ್ಮ ದಿನ ನಿತ್ಯದ ಆವಶ್ಯಕತೆಗಳನ್ನು ಪೂರೈಸುವಲ್ಲಿ ಕಷ್ಟ ಪಡುತ್ತಿರುತ್ತಾರೆ. ಹೀಗಾಗಿ ಅವರು ತಮ್ಮ ಮಕ್ಕಳಿಗೆ ಶಿಕ್ಷಣ ನೀಡುವಲ್ಲಿ ವಿಫಲರಾಗುತ್ತಾರೆ ಎಂದು ಅಜ್ಮಲ್ ವಿವರಿಸುತ್ತಾರೆ.

ಮುಸ್ಲಿಮರಿಗೆ ಮೀಸಲಾತಿಯ ಅವಶ್ಯಕತೆಯಿದೆ. ಈ ನಿಟ್ಟಿನಲ್ಲಿ ರಂಗನಾಥ ಮಿಶ್ರಾ ವರದಿ ಜಾರಿಗೆ ಬರಬೇಕು ಎಂದು ಅಜ್ಮಲ್ ಆಗ್ರಹಿಸಿದ್ದಾರೆ.