ದೇಶದ ಎರಡನೆ ಅತಿ ದೊಡ್ಡ ಬಾಹುಬಲಿ ಪ್ರತಿಮೆ

ಬೆಂಗಳೂರು, ಮೇ 25: ರಾಷ್ಟ್ರ ಪ್ರಶಸ್ತಿ ವಿಜೇತ ಶಿಲ್ಪಿ ಅಶೋಕ್ ಗುಡಿಗಾರ್‌ಗೆ, 400 ಟನ್ ತೂಕ ತೂಗುವ 41 ಅಡಿಗಳ ಸುಂದರ ಏಕಶಿಲಾ ಗ್ರಾನೈಟ್‌ನ ಬಾಹುಬಲಿ ವಿಗ್ರಹವನ್ನು ನಿರ್ಮಿಸಲು 14 ತಿಂಗಳುಗಳು ಕಳೆದಿವೆ.

ಗುಜರಾತ್‌ನ ಶ್ರೀ ಕುಂದ್ ಕುಂದ್ ಕಹಾನ್ ದಿಗಂಬರ್ ಜೈನ್ ಸ್ವಾಧ್ಯಾಯ ಮಂದಿರ ಟ್ರಸ್ಟ್ ಈ ಬೃಹತ್ ಬಾಹುಬಲಿಯ ವಿಗ್ರವನ್ನು ಪ್ರತಿಷ್ಠಾಪಿಸಲು ಯೋಜನೆ ರೂಪಿಸಿತ್ತು. ಈ ವಿಗ್ರಹ ನಿರ್ಮಾಣಕ್ಕೆ ಬೇಕಾಗಿದ್ದ ಬೃಹತ್ ಶಿಲೆಗಾಗಿ ಸುಮಾರು ಎರಡು ವರ್ಷಗಳ ಕಾಲ ಹುಡುಕಾಟ ನಡೆಸಲಾಗಿತ್ತು. ಕೊನೆಗೂ ಅವರಿಗೆ ಇಲ್ಲಿನ ಪ್ರದೇಶವೊಂದರಲ್ಲಿ ಈ ಶಿಲೆ ದೊರಕಿತ್ತು ಮತ್ತು ವಿಗ್ರಹದ ಕೆತ್ತನೆ ಆರಂಭಿಸಲಾಗಿತ್ತು.

ಇಡೀ ಯೋಜನೆಯ ಸಂಪೂರ್ಣ ನಿಧಿ ಯನ್ನು ಟ್ರಸ್ಟ್ ಭರಿಸಿದೆ ಎಂದು ಬಾಹುಬಲಿ ಪ್ರತಿಮೆ ಪ್ರತಿಷ್ಠಾಪನಾ ಯೋಜನೆಯ ಕಾರ್ಯಾಚರಣೆಯಲ್ಲಿ ಒಬ್ಬರಾಗಿರುವ ಮನೀಶ್ ಶಾ ಹೇಳುತ್ತಾರೆ. ಇದು ಜೈನ ಸಮುದಾಯದ ಗೌರವದ ಸಂಕೇತವಾಗಿದೆ ಎಂದು ಅವರು ಅಭಿಪ್ರಾಯ ಪಟ್ಟಿದ್ದಾರೆ.

ಈ ಬಾಹುಬಲಿ ವಿಗ್ರಹವನ್ನು ಗುಜರಾತ್‌ನ ಭಾವ್‌ನಗರ್‌ನ ಸೋಂಗಧ್ ಗ್ರಾಮದಲ್ಲಿ ಪ್ರತಿಷ್ಠಾಪಿಸಲಾಗುವುದು. ಕಳೆದ ರಾತ್ರಿ ಈ ಬೃಹತ್ ಪ್ರತಿಮೆಯನ್ನು ಅದಕ್ಕಾಗಿಯೇ ತಯಾರಿಸಲಾದ ವೊಲ್ವೊ ಬಸ್ ಒಂದರ ಮೂಲಕ ಗುಜರಾತ್‌ಗೆ ರವಾನಿಸಲಾಗಿದೆ. ಅದು ತಲುಪಬೇಕಾದ ಸ್ಥಳಕ್ಕೆ ತಲುಪಲು ಕೆಲವು ದಿನಗಳೇ ಬೇಕಾಗಬಹುದು. ಈ ಅಧಿಕ ತೂಕವಿರುವ ಬೃಹತ್ ಪ್ರತಿಮೆಯನ್ನು ಹೊತ್ತ ಬಸ್ ದಿನಕ್ಕೆ 20 ಕಿ.ಮೀ. ಮಾತ್ರ ಪ್ರಯಾಣಿಸುತ್ತದೆ.

‘‘ಪ್ರತಿಮೆಯ ಕೆಲಸ ಶೇ. 80ರಷ್ಟು ಮಾತ್ರ ಮುಗಿದಿದೆ. ಈಗಲೇ ಅದು ಸುಂದರವಾಗಿ ಕಾಣಿಸುತ್ತಿದೆ’’ ಎಂದು ಪ್ರತಿಮೆಯನ್ನು ಕೆತ್ತಿದ ಶಿಲ್ಪಿ ಗುಡಿಗಾರ್ ಹೇಳುತ್ತಾರೆ.

ಪ್ರತಿಮೆಯನ್ನು ಸಾಗಿಸುವ ವೇಳೆ ಕೆಲವು ಕೆರೆತಗಳುಂಟಾಗಬಹುದು, ಹೀಗಾಗಿ ಅದರ ಕೆಲಸವನ್ನು ಪೂರ್ಣಗೊಳಿಸಲಾಗಿಲ್ಲ ಎಂದು ಅವರು ಸ್ಪಷ್ಟ ಪಡಿಸಿದ್ದಾರೆ. ಈ ಪ್ರತಿಮೆಯ ವಿಶೇಷವೆಂದರೆ, ದೇಶದಲ್ಲೇ ಇದು ಎರಡನೆ ಅತಿ ದೊಡ್ಡ ಬಾಹುಬಲಿ ವಿಗ್ರಹವೆಂಬ ಹೆಗ್ಗಳಿಗೆ ಪಾತ್ರವಾ ಗಲಿದೆ. ಶ್ರವಣಬೆಳಗೊಳದ ಬಾಹುಬಲಿ ವಿಗ್ರಹವು ದೇಶದ ಅತಿ ದೊಡ್ಡ ಬಾಹುಬಲಿ ವಿಗ್ರಹ ಎಂಬ ಗೌರವಕ್ಕೆ ಪಾತ್ರವಾಗಿದೆ.