ಏರ್ ಇಂಡಿಯಾ ನೌಕರರ ದಿಢೀರ್ ಮುಷ್ಕರ

ಹೊಸದಿಲ್ಲಿ, ಮೇ 25: ಕ್ಯಾಬಿನ್ ಸಿಬ್ಬಂದಿಗಳ ಕೆಲಸದ ಸಮಸ್ಯೆ ಹಾಗೂ ವೇತನ ವಿಳಂಬವನ್ನು ವಿರೋಧಿಸಿ ಏರ್ ಕಾರ್ಪೊರೇಷನ್ ನೌಕರರ ಸಂಘದ ನೇತೃತ್ವದಲ್ಲಿ ಏರ್ ಇಂಡಿಯಾ ನೌಕರರು ದಿಢೀರ್ ಮುಷ್ಕರ ಹೂಡಿದ್ದಾರೆ.
ವಿಮಾನದ ಹಾರಾಟಕ್ಕೆ ನೌಕರರ ಪ್ರತಿಭಟನೆಯಿಂದ ಯಾವುದೇ ತೊಂದರೆಯಾಗಿಲ್ಲ ಎಂದು ಏರ್ ಇಂಡಿಯಾದ ವಕ್ತಾರ ತಿಳಿಸಿದ್ದಾರೆ.

‘‘ಕ್ಯಾಬಿನ್ ಸಿಬ್ಬಂದಿಗಳ ಕೆಲಸದ ಸ್ಥಿತಿಗತಿಯ ಸುಧಾರಣೆ ಮತ್ತು ವೇತನ ವಿಳಂಬ ಸೇರಿದಂತೆ ಇತರ ಬೇಡಿಕೆ ಗಳ ಈಡೇರಿಕೆಗೆ ಏರ್ ಇಂಡಿಯಾ ಆಡಳಿತ ಮಂಡಳಿ ನಿರಾಕರಿಸಿರುವ ಹಿನ್ನೆಲೆಯಲ್ಲಿ ನಾವು ದಿಢೀರ್ ಮುಷ್ಕರ ಹೂಡಿದ್ದೇವೆ’’ ಎಂದು ಏರ್ ಕಾರ್ಪೊ ರೇಷನ್ ನೌಕರರ ಸಂಘ (ಎಸಿಇಯು)ದ ಪ್ರಧಾನ ಕಾರ್ಯದರ್ಶಿ ಜೆ.ಬಿ. ಕಾದಿಯಾನ್ ಸುದ್ದಿಗಾರರಿಗೆ ತಿಳಿಸಿದ್ದಾರೆ. ಮೇ ತಿಂಗಳ ವೇತನ ಒಂದು ವಾರ ವಿಳಂಬವಾಗಿ ನೀಡಲು ಏರ್ ಇಂಡಿಯಾ ಇತ್ತೀಚೆಗೆ ನಿರ್ಧರಿಸಿತ್ತು.

ಎಲ್ಲ ನೌಕರರ ಸಂಘಗಳ ವಿರುದ್ಧ ಏರ್ ಇಂಡಿಯಾ ಆಡಳಿತ ಮಂಡಳಿ ‘ಸದ್ದು ಅಡಗಿಸುವ ಆದೇಶ’ಗಳನ್ನು ನೀಡುತ್ತಿದೆ. ಸಮಸ್ಯೆಗಳನ್ನು ಸಾರ್ವಜನಿಕವಾಗಿ ವ್ಯಕ್ತಪಡಿಸದಂತೆ ನಿರ್ಬಂಧ ಹೇರಿದೆ. ಈ ರೀತಿ ಸಾರ್ವಜನಿಕವಾಗಿ ವ್ಯಕ್ತಪಡಿಸಿದರೆ ಅದು ಪ್ರಜಾಪ್ರಭುತ್ವ ವಿರೋಧಿ ಎಂದು ಏರ್ ಇಂಡಿಯಾ ಹೇಳಿದೆ ಎಂದವರು ಆರೋಪಿಸಿದರು.

ಕ್ಯಾಬಿನ್ ಸಿಬ್ಬಂದಿ, ತಾಂತ್ರಿಕ ಸಿಬ್ಬಂದಿ, ನೆಲದಲ್ಲಿ ಕಾರ್ಯನಿರ್ವಹಿಸುವ ಸಿಬ್ಬಂದಿಗಳು ಸೇರಿದಂತೆ ಈ ಮೊದಲಿದ್ದ ಇಂಡಿಯನ್ ಏರ್ ಲೈನ್ಸ್ ಸಿಬ್ಬಂದಿ ಸಹಿತ 12000 ನೌಕರರನ್ನು ಎಸಿಇಯು ಪ್ರತಿನಿಧಿಸುತ್ತದೆ.

ಏರ್ ಇಂಡಿಯಾದ ವೇತನ ವಿಳಂಬವಾಗಿ ನೀಡುವ ನಿರ್ಧಾರದ ವಿರುದ್ಧ ನೌಕರರ ಸಂಘ ಮುಷ್ಕರ ಹೂಡುವುದಾಗಿ ಆಡಳಿತ ಸಮಿತಿ ಮತ್ತು ಮುಖ್ಯ ಕಾರ್ಮಿಕ ಆಯುಕ್ತರಿಗೆ ಮೇ 15ರಂದು ನೋಟಿಸ್ ನೀಡಿತ್ತು. ಆದರೆ, ಮೇ 31ರಿಂದ ಮುಷ್ಕರ ಹೂಡುವುದಾಗಿ ನೋಟಿಸ್ನಲ್ಲಿ ತಿಳಿಸಲಾಗಿತ್ತು.
ಆದಾಗ್ಯೂ, ಏರ್ ಇಂಡಿಯಾದ ಅಂತಾರಾಷ್ಟ್ರೀಯ ವಿಭಾಗದ ನೌಕರರು ಮುಷ್ಕರದಲ್ಲಿ ಭಾಗವಹಿಸಿರಲಿಲ್ಲ.

ಎಸಿಇಯು, ನ್ಯಾಷನಲ್ ಏವಿಯೇಷನ್ ಕಂಪೆನಿ ಆಫ್ ಇಂಡಿಯಾ ಲಿಮಿಟೆಡ್ನ 11 ಪ್ರಮುಖ ಕಾರ್ಮಿಕ ಸಂಘಟನೆಗಳ ನಾಗರಿಕ ವಿಮಾನಯಾನ ಜಂಟಿ ಕ್ರಿಯಾ ವೇದಿಕೆ (ಸಿಎಜೆಎಎಫ್)ಯ ಭಾಗವಾಗಿದೆ.

ಆದಾಗ್ಯೂ, ‘ಸಂಘದ ಇತರ ಯಾವುದೇ ವಿಭಾಗ ಮುಷ್ಕರದ ಬಗ್ಗೆ ನಿರ್ಧಾರ ತೆಗೆದುಕೊಂಡಿಲ್ಲ. ಆದರೆ ನಾವು ಎಸಿಇಯುನ ಉದ್ದೇಶದ ಬಗ್ಗೆ ಕಾಳಜಿ ಹೊಂದಿದ್ದೇವೆ’ ಎಂದು ಸಿಎಜೆಎಎಫ್ನ ವಕ್ತಾರ ವಿ.ಜೆ.ದೇಖಾ ಹೇಳಿದ್ದಾರೆ.

ಕಾರ್ಮಿಕ ಸಂಘಟನೆಗಳ ನಾಯಕರ ವಿರುದ್ಧ ‘ಸದ್ದು ಅಡಗಿಸುವ ಆದೇಶ’ ಹೊರಡಿಸಿರುವುದನ್ನು ನಾವು ಖಂಡಿಸುತ್ತೇವೆ ಎಂದು ಅವರು ಹೇಳಿದರು.
ಇಂದು ಮಧ್ಯಾಹ್ನ 12.30ರಿಂದ ಮುಷ್ಕರ ಆರಂಭಗೊಂಡಿದ್ದು, ಹಲವು ನಗರಗಳಿಗೆ ತೆರಳುವ ವಿಮಾನಗಳನ್ನು ರದ್ದುಪಡಿಸಲಾಯಿತು.

ನೌಕರರ ಮುಷ್ಕರದಿಂದಾಗಿ ದಿಲ್ಲಿ-ಮುಂಬೈ- ಕೊಲ್ಕತ್ತಾಕ್ಕೆ ತೆರಳುವ ಎರಡು ವಿಮಾನಗಳನ್ನು ರದ್ದು ಪಡಿಸಲಾಯಿತು. ಹೊಸದಿಲ್ಲಿಯಿಂದ ಪುಣೆಗೆ ಹೋಗುವ 849, ಅಹ್ಮದಾಬಾದ್ಗೆ ತೆರಳುವ 861, ಪಾಟ್ನಾಕ್ಕೆ ತೆರಳುವ 415 ಮತ್ತು ಭೋಪಾಲ್ಗೆ ತೆರಳುವ 134 ಸಂಖ್ಯೆಗಳ ವಿಮಾನಗಳನ್ನು ರದ್ದು ಪಡಿಸಲಾಯಿತು.
ಚೆನ್ನೈಯಿಂದ ಕೊಲಂಬೊಗೆ ತೆರಳುವ ಐಸಿ 573 ಮತ್ತು ಸಿಂಗಾಪುರಕ್ಕೆ ಹೋಗುವ ಐಸಿ 448 ಎಂಬ ಎರಡು ಏರ್ ಇಂಡಿಯಾ ವಿಮಾನ ಯಾನವನ್ನು ರದ್ದುಪಡಿಸಲಾಯಿತು.