ಬಜ್ಪೆ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ ಸ್ಥಳಾಂತರಿಸಿ

ಮಾನ್ಯರೆ,

ಹದಿನೈದು ವರ್ಷಗಳ ಹಿಂದೆ ಪಡುಬಿದ್ರೆ ಪರಿಸರದಲ್ಲಿ ಎನ್‌ಟಿಪಿಸಿ ಕೈಗಾರಿಕೆ ಬರಲು ಸಹಸ್ರಾರು ಎಕ್ರೆ ಜಾಗವನ್ನು ಸರಕಾರ ವಶಪಡಿಸಿತು. ಸಾರ್ವಜನಿಕರ ಹೋರಾಟಕ್ಕೆ ಮಣಿದು ಆ ಕಂಪೆನಿ ಕಾಲು ಕಿತ್ತಿತ್ತು. ಮೈದಾನವಾದ ಒಳ್ಳೆಯ ಸ್ಥಳ ಹಾಗೆಯೇ ಉಳಿಯಿತು. ಆ ಸಮಯದಲ್ಲಿ ಬಜಪೆ ವಿಮಾನ ನಿಲ್ದಾಣವನ್ನು ವಿಸ್ತರಿಸುವ ಪ್ರಸ್ತಾಪ ರೂಪುಗೊಂಡಿತು. ಪರಿಣಿತರು ಇಲ್ಲಿ ಎಷ್ಟೇ ಶ್ರಮ ವಹಿಸಿದರೂ ಸಾಕಷ್ಟು ರನ್‌ವೇ ಮಾಡಲು ಸ್ಥಳವಿಲ್ಲ ಎಂದು ವರದಿ ಒಪ್ಪಿಸಿತು.

ಆ ಸಮಯದಲ್ಲಿ ನಮ್ಮ ಮುಲ್ಕಿಯ ಪುಂಜಾರವರು ವಿಮಾನ ಅಥಾರಿಟಿಯಲ್ಲಿ ಉನ್ನತ ಹುದ್ದೆಯಲ್ಲಿದ್ದರು. ಮುಲ್ಕಿಯ ಹರಿ ಪುಂಜಾ ಮತ್ತು ನಾನು ಪಡುಬಿದ್ರಿಯಲ್ಲಿ ವಿಮಾನ ನಿಲ್ದಾಣ ಬರಲಿ ಎಂದು ಶ್ರಮಿಸಿದೆವು. ಆದರೆ ಅದು ಕಾರ್ಯಗತಗೊಳ್ಳುತ್ತದೆ ಎಂದಾಗಲೇ ದಿಲ್ಲಿಯಲ್ಲಿ ಸಚಿವರಾಗಿದ್ದ ನಮ್ಮವರೇ ಅಡ್ಡಗಾಲು ಇರಿಸಿ ಬಜ್ಪೆಯ ರನ್‌ವೇಯನ್ನು ವಿಸ್ತರಿಸುವಂತೆ ಮಾಡಲು ಸಫಲರಾದರು. ನಮ್ಮ ಪ್ರಯತ್ನ ಕೈಗೂಡಲಿಲ್ಲ.ಈಗ ಆ ಪಡುಬಿದ್ರಿ ಪ್ರದೇಶಕ್ಕೆ ನಾಗಾರ್ಜುನ ಭೂತ ಪ್ರವೇಶಿಸಿದೆ.

ಬಜ್ಪೆ ವಿಮಾನ ನಿಲ್ದಾಣ ಸರಿಯಿಲ್ಲವೆಂದು ಮೊದಲೇ ಎಚ್ಚರಿಸಿದ್ದೆ. ಅದೃಷ್ಟದಿಂದ ವೀರಪ್ಪ ಮೊಲಿಯವರು ಬದುಕಿ ಬಂದರು. ಈಗ ನೂರ ಅರುವತ್ತಕ್ಕಿಂತಲೂ ಹೆಚ್ಚಿನ ಜನರ ಮಾರಣಹೋಮವಾಗಿದೆ. ಮುಂದಕ್ಕೆ ಆಗುವ ಅನಾಹುತಕ್ಕೆ ಎಚ್ಚರಿಕೆ ಗಂಟೆಯಾಗಿದೆ. ಈಗ ಬಜ್ಪೆ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣವಾಗಲಿದೆ. ಸಾಕಷ್ಟು ಜಾಗವಿಲ್ಲ. ಬಜಪೆಯಿಂದ ಈ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣವನ್ನು ಬೇರೆಡೆಗೆ ವರ್ಗಾಯಿಸಿ ಜನರ ಪ್ರಾಣಕ್ಕೆ ರಕ್ಷಣೆ ನೀಡುವ ಜವಾಬ್ದಾರಿ ಸರಕಾರಕ್ಕಿದೆ. ದಯಮಾಡಿ ಈ ಬಗ್ಗೆ ತಾಂತ್ರಿಕ ವರ್ಗದಿಂದ ಸೂಕ್ತ ಮಾರ್ಗದರ್ಶನವನ್ನು ಸರಕಾರ ಪಡೆದು ಪುನರ್ ಪರಿಶೀಲಿಸಬೇಕಾಗಿ ವಿನಂತಿ.

-ಹರಿಕೃಷ್ಣ ಪುನರೂರು,