ಬದುಕುಳಿದವರಿಗೆ ಏರಿಂಡಿಯಾದಿಂದ ಉದ್ಯೋಗ

ಮಂಗಳೂರು ವಿಮಾನಾಪಘಾತ

ಹೊಸದಿಲ್ಲಿ, ಮೇ 25: ಶನಿವಾರ ಮಂಗಳೂರಿನಲ್ಲಿ ಸಂಭವಿಸಿದ ವಿಮಾನಾಪಘಾತದಲ್ಲಿ ಬದುಕುಳಿ ದವರು ಬಯಸಿದಲ್ಲಿ ಅವರಿಗೆ ಉದ್ಯೋಗ ನೀಡುವುದಕ್ಕೆ ಏರ್ ಇಂಡಿಯಾ ಮುಂದಾಗಿದೆ.
ಪತ್ರಿಕಾಗೋಷ್ಠಿಯೊಂದರಲ್ಲಿ ಈ ವಿಷಯ ಪ್ರಕಟಿಸಿದ ವಿಮಾನ ಸಂಸ್ಥೆಯ ಅಧ್ಯಕ್ಷ ಹಾಗೂ ಆಡಳಿತ ನಿರ್ದೇಶಕ ಅರವಿಂದ ಜಾಧವ್, ಬದುಕುಳಿದಿರುವ 8 ಮಂದಿಯಲ್ಲಿ ಏಳು ಜನ ಪಶ್ಚಿಮ ಏಶ್ಯದಲ್ಲಿ ನೌಕರಿಯಲ್ಲಿದ್ದವರಾಗಿದ್ದು, ಅವರು ತಮ್ಮ ಉದ್ಯೋಗ ಪರವಾನಿಗೆಯನ್ನು ಕಳೆದುಕೊಂಡಿ ದ್ದಾರೆ.

ಆದುದರಿಂದ ಅವರು ಮರಳಿ ಅಲ್ಲಿಗೆ ಉದ್ಯೋಗಕ್ಕೆ ಹೋಗುವಂತಿಲ್ಲ. ಏರಿಂಡಿಯಾವು ಅವರನ್ನು ತನ್ನ ನೌಕರ ಪಡೆಗೆ ಸೇರಿಸಿಕೊಳ್ಳಲು ಹರ್ಷ ಪಡುತ್ತದೆ ಎಂದಿದ್ದಾರೆ.
ಉಮರ್ ಫಾರೂಕ್ ಮುಹಮ್ಮದ್, ಜೋಯೆಲ್ ಪ್ರತಾಪ್ ಡಿಸೋಜಾ, ಮಾಯಿನ್ ಕುಟ್ಟಿ, ಕೃಷ್ಣನ್ ಕೂಲಿಕುನ್ನು, ಜಿ.ಕೆ. ಪ್ರದೀಪ್, ಮುಹಮ್ಮದ್ ಉಸ್ಮಾನ್ ಹಾಗೂ ಪುತ್ತೂರು ಇಸ್ಮಾಯೀಲ್ ಅಬ್ದುಲ್ಲಾ ಹಾಗೂ ಮಣಿಪಾಲದಲ್ಲಿ ವೈದ್ಯಕೀಯ ವಿದ್ಯಾರ್ಥಿನಿಯಾಗಿರುವ ಬಾಂಗ್ಲಾ ದೇಶದ ಸಬ್ರಿನಾ ನಾಸಿರ್ ಹಕ್ ಬದುಕುಳಿದವರಾಗಿದ್ದಾರೆ.