ಅನ್ಸಾರಿಯ ಗಲ್ಲಿಗೆ ಸು.ಕೋರ್ಟ್ ತೆಡೆ

ಅಮೆರಿಕನ್ ಸೆಂಟರ್ ದಾಳಿ

ಹೊಸದಿಲ್ಲಿ, ಮೇ 25: ಕೋಲ್ಕತಾದ ಅಮೆರಿಕನ್ ಸೆಂಟರ್ನ ಮೇಲೆ 2002ರಲ್ಲಿ ನಡೆಸಲಾದ ದಾಳಿ ಪ್ರಕರಣದ ಆರೋಪಿ, ಭೂಗತ ಪಾತಕಿ ಅಫ್ತಾಬ್ ಅಹ್ಮದ್ ಅನ್ಸಾರಿಗೆ ವಿಧಿಸಲಾಗಿದ್ದ ಮರಣ ದಂಡನೆಗೆ ಸುಪ್ರೀಂ ಕೋರ್ಟ್ ಇಂದು ತಡೆಯಾಜ್ಞೆ ನೀಡಿದೆ.

ಪ್ರಕರಣದಲ್ಲಿ ತನ್ನನ್ನು ದೋಷಿಯನ್ನಾಗಿಸಿ ಮರಣದಂಡನೆ ವಿಧಿಸಿರುವುದನ್ನು ಪ್ರಶ್ನಿಸಿ ಅನ್ಸಾರಿ ಸಲ್ಲಿಸಿರುವ ದೂರೊಂದರ ಸಂಬಂಧ ನಾಲ್ಕು ತಿಂಗಳುಗಳೊಳಗೆ ಉತ್ತರ ನೀಡುವಂತೆ ನ್ಯಾಯಮೂರ್ತಿಗಳಾದ ಜಿ.ಎಸ್. ಸಿಂಘ್ವಿ ಹಾಗೂ ಸಿ.ಕೆ. ಪ್ರಸಾದ್ರನ್ನೊಳಗೊಂಡಿದ್ದ ರಜಾಕಾಲದ ಪೀಠವೊಂದು ಪಶ್ಚಿಮ ಬಂಗಾಳ ಸರಕಾರಕ್ಕೆ ಆದೇಶಿಸಿದೆ.

2002ರ ಜ.22ರಂದು ಮೋಟಾರ್ ಬೈಕ್ಗಳಲ್ಲಿ ಬಂದಿದ್ದ ಇಬ್ಬರು ದುಷ್ಕರ್ಮಿಗಳು ಜವಾಹರಲಾಲ್ ನೆಹರೂ ರಸ್ತೆಯ ಅಮೆರಿಕನ್ ಸೆಂಟರ್ನ ಹೊರಗೆ ಕಾವಲಿದ್ದ ಪೊಲೀಸರ ಮೇಲೆ ಎಕೆ-47 ರೈಫಲ್ನಿಂದ ಗುಂಡು ಹಾರಿಸಿದುದಲ್ಲದೆ, 6 ಮಂದಿಯನ್ನು ಕೊಂದು 14 ಜನರನ್ನು ಗಾಯಗೊಳಿಸಿದ್ದರು.

2010ರ ಫೆಬ್ರವರಿಯಲ್ಲಿ ಕೊಲ್ಕತಾ ಹೈಕೋರ್ಟ್ನ ವಿಭಾಗೀಯ ಪೀಠವೊಂದು ಅನ್ಸಾರಿ ಹಾಗೂ ಸಹ ಆರೋಪಿ ಜಮೀಲುದ್ದೀನ್ ನಾಸಿರ್ ಎಂಬಾತನಿಗೆ ವಿಧಿಸಲಾಗಿದ್ದ ಮರಣ ದಂಡನೆಯನ್ನು ಎತ್ತಿ ಹಿಡಿದಿತ್ತಾದರೂ, ಇತರ ಮೂವರಿಗೆ ವಿಧಿಸಲಾಗಿದ್ದ ಮರಣ ದಂಡನೆಯನ್ನು 7 ವರ್ಷಗಳ ಸೆರೆವಾಸಕ್ಕೆ ಇಳಿಸಿತ್ತು.
ಈ ತಿಂಗಳ ಆರಂಭದಲ್ಲಿ, ನಾಸಿರ್ಗೆ ವಿಧಿಸಲಾಗಿರುವ ಮರಣದಂಡನೆಗೂ ಸುಪ್ರೀಂ ಕೋರ್ಟ್ ತಡೆಯಾಜ್ಞೆ ನೀಡಿತ್ತು.