ಕರಗಿದ ಶಾರ್ಜಾ ಕನಸು

ಬೆಳ್ತಂಗಡಿ, ಮೇ 22: ರಜಾಕಾಲವನ್ನು ಶಾರ್ಜಾದಲ್ಲಿ ಕಳೆದು ಹಿಂದಿ ರುಗುತ್ತಿದ್ದ ಬೆಳ್ತಂಗಡಿ ಮದ್ದಡ್ಕದ ಕುಟುಂಬವೊಂದರ ತಾಯಿ ಹಾಗೂ ಮೂವರು ಮಕ್ಕಳು ಮಂಗಳೂರಿನಲ್ಲಿಂದು ನಡೆದ ವಿಮಾನ ಅಪಘಾತದಲ್ಲಿ ಮೃತಪಟ್ಟಿದ್ದಾರೆ.
ಶಾರ್ಜಾದಲ್ಲಿ ಕ್ಯಾಂಟೀನ್ ನಡೆಸುತ್ತಿರುವ ಹಸನಬ್ಬ ಎಂಬವರ ಪತ್ನಿ ಮಮ್ತಾಝ್ (27), ಮಕ್ಕಳಾದ ಮುಹ್‌ಸೀನಾ (6), ಇಬಾಹಸೀನಾ (4) ಹಾಗೂ ಐಫಾ(ಹಸುಳೆ) ಮೃತಪಟ್ಟವರು.

ಹಸನಬ್ಬ ಬೆಳ್ತಂಗಡಿ ಸಮೀಪ ಮೆಲೆಂತಬೆಟ್ಟುವಿನ ಅಬೂಬಕರ್ ಹಾಗೂ ನಫೀಸಾ ದಂಪತಿಗಳ ಮಗನಾಗಿದ್ದು, ಕಳೆದ 15 ವರ್ಷಗಳಿಂದ ಶಾರ್ಜಾದಲ್ಲಿ ಕೆಲಸ ಮಾಡುತ್ತಿದ್ದರು. ರಜೆ ಕಳೆಯಲೆಂದು ಎರಡು ತಿಂಗಳ ಹಿಂದೆ ಮಮ್ತಾಝ್ ಕುಟುಂಬದೊಂದಿಗೆ ಪತಿಯ ಬಳಿಗೆ ತೆರಳಿದ್ದರು.

ಎರಡು ವರ್ಷದ ಹಿಂದೆ ಹಸನಬ್ಬರ ಕುಟುಂಬ ಮದ್ದಡ್ಕ ಸಮೀಪ ಹೊಸ ಮನೆ ನಿರ್ಮಿಸಿ ಅಲ್ಲಿ ವಾಸಿಸುತ್ತಿದ್ದರು. ಹಿರಿಯ ಮಗಳು ವಾಣಿ ಆಂಗ್ಲ ಮಾಧ್ಯಮ ಶಾಲೆಯಲ್ಲಿ ಯುಕೆಜಿ ಕಲಿಯುತ್ತಿದ್ದಳು. ಮಮ್ತಾಝ್ ಬಾಂಬಿಲದ ಅಬ್ದುಲ್ ಖಾದರ್ ಎಂಬವರ ಪುತ್ರಿ.