ದುರ್ಬಲವಾಗುತ್ತಿರುವ ಮೀಸಲಾತಿ ಪರಿಕಲ್ಪನೆ ಟಿಪ್ಪು ಸುಲ್ತಾನ್ ಹುತಾತ್ಮ ದಿನಾಚರಣೆಯಲ್ಲಿ ಸರ್ಫ್ರಾಝ್ ಚಂದ್ರಗುತ್ತಿ ಆತಂಕ

ತರೀಕೆರೆ, ಮೇ 25: ಜಾಗತೀಕರಣದ ಹೆಸರಿನಲ್ಲಿ ಆಡಳಿತ ನಡೆಸುವ ನಾಯಕರು ಮೀಸಲಾತಿಯ ಪರಿಕಲ್ಪನೆಯನ್ನು ಅಪ್ರಸ್ತುತ ಎನ್ನುವ ಮಟ್ಟಕ್ಕೆ ತಂದಿದ್ದಾರೆ ಎಂದು ಖ್ಯಾತ ವಿಚಾರವಾದಿ ಸರ್ಫ್ರಾಝ್ ಚಂದ್ರಗುತ್ತಿ ಆತಂಕ ವ್ಯಕ್ತಪಡಿಸಿದ್ದಾರೆ.
ಟಿಪ್ಪು ಸುಲ್ತಾನ್ ಹುತಾತ್ಮ ದಿನಾಚರಣೆಯ ಅಂಗವಾಗಿ ‘ಹಿಂದುಳಿದ ವರ್ಗ ಮತ್ತು ಅಲ್ಪಸಂಖ್ಯಾತರಿಗೆ ಮೀಸಲಾತಿ’ ಎಂಬ ವಿಷಯದ ಬಗ್ಗೆ ಪುರಸಭೆ ಸಭಾ ಭವನದಲ್ಲಿ ಏರ್ಪಡಿಸಲಾಗಿದ್ದ ವಿಚಾರ ಸಂಕಿರಣದಲ್ಲಿ ಅವರು ಮಾತನಾಡುತ್ತಿದ್ದರು.

ಮೀಸಲಾತಿ ಬರೀ ಬದುಕು ಬದುಕಲು ಸೀಮಿತವಾಗಿದ್ದು, ಪ್ರಗತಿಯ ಪಥದಲ್ಲಿ ಹಿಂದುಳಿದ ವರ್ಗ, ಅಲ್ಪಸಂಖ್ಯಾತರು ಅವಕಾಶ ವಂಚಿತರಾಗಿದ್ದಾರೆ. ಅಸಮಾನತೆಯ ಸಮಾಜ ಸಷ್ಟಿಯಾಗಿ, ಅಸಹನೆ, ಅಸೂಯೆ ಹುಟ್ಟಿಕೊಂಡು ನಕ್ಸಲಿಸಂ ಬೆಳೆಯಲು ಕಾರಣ ವಾಯಿತು ಎಂದು ಅವರು ಅಭಿಪ್ರಾಯಪಟ್ಟರು.ಜಾತಿ ಪದ್ಧತಿ ರಾಜಕಾರಣ, ಮನುಷ್ಯ ಮನುಷ್ಯರನ್ನು ಒಡೆದಾಳುವ ನೀತಿ ಪಾಶ್ಚಿಮಾತ್ಯರ ವಿಚಾರಧಾರೆಯಿಂದ ಬಂದಿದೆ. ಅನಿಷ್ಠ ರಾಜಕಾರಣಕ್ಕೆ ಜಾತಿಯನ್ನು ಎತ್ತಿಕಟ್ಟುವುದು ಒಂದೆಡೆಯಾದರೆ ಮೀಸಲಾತಿಯ ಲಾಭವನ್ನು ಕೆಲವೇ ಕೆಲವು ಕೊನೆ ಪದರದ ಜನ ಅನುಭವಿಸಿ ಶೋಷಿತರನ್ನು ಕೊನೆ ಪದರದ ಅದೇ ಜನ ಶೋಷಣೆ ಮಾಡುವ ವಿಪರ್ಯಾಸ ಮೀಸಲಾತಿ ಅನುಷ್ಠಾನದಲ್ಲಿ ನಡೆಯುತ್ತಿದೆ ಎಂದು ಸರ್ಫ್ರಾಝ್ ವಿಷಾದ ವ್ಯಕ್ತಪಡಿಸಿದರು.

ಆಳುವ ಪಕ್ಷಗಳು ಒಂದೆಡೆ ಮೀಸಲಾತಿ ನೀಡಿ ಇನ್ನೊಂದೆಡೆ ಖಾಸಗೀಕರಣದ ಭೂತವನ್ನು ಹುಟ್ಟು ಹಾಕುತ್ತಿದೆ. ಇದರಿಂದ ಉದ್ಯೋಗ ಸಷ್ಟಿಯಾಗುವ ಬಹುರಾಷ್ಟ್ರೀಯ ಕಂಪೆನಿಗಳಲ್ಲಿ ಉಳ್ಳವರಿಗೆ ಸವಲತ್ತು, ಕೆಲವೇ ಜಾತಿಗೆ ಮನ್ನಣೆ, ಪ್ರತಿಭೆ ಎಂಬ ಹೆಸರಿನಲ್ಲಿ ಅಸಮಾನತೆಯ ಸಮಾಜ ನಿರ್ಮಾಣವಾಗುತ್ತಿದೆ ಎಂದು ಅವರು ದೂರಿದರು.
ಕೇವಲ ಅಂಕಗಳ ಆಧಾರದ ಮೇಲೆ ಪ್ರತಿಭೆ ಗುರುತಿಸುವ ಮಾನದಂಡ ಸಮಾಜಕ್ಕೆ ಮಾರಕವಾಗಿದೆ. ಬಹುರಾಷ್ಟ್ರೀಯ ಕಂಪೆನಿಗಳಲ್ಲಿ, ಖಾಸಗಿ ಕ್ಷೇತ್ರದಲ್ಲಿ ವಿಶೇಷವಾಗಿ ಆರ್ಥಿಕ ವಲಯದಲ್ಲಿ ಅಂಬೇಡ್ಕರ್ ಪರಿಕಲ್ಪನೆಯ ಮೀಸಲಾತಿ ಅವಶ್ಯಕವಿದೆ ಎಂದು ಚಂದ್ರಗುತ್ತಿ ತಿಳಿಸಿದರು.

ಡಾ.ಚವಾಣ್ ತರೀಕೆರೆ ಮಾತನಾಡಿ, ಖಾಸಗೀಕರಣದ ಹಿಂದೆ ಪುರೋಹಿತ ಶಾಹಿ ಚಿಂತನೆಗಳಿದ್ದು, ಸ್ವಾತಂತ್ರ ಪೂರ್ವದಲ್ಲಿದ್ದ ಒಡೆದು ಆಳುವ ನೀತಿ ಮುಂದುವರಿಸುವ ಸಂಚು ಇದರಲ್ಲಿ ಅಡಗಿದೆ. ಇದು ಸಮಾಜಕ್ಕೆ ಮಾರಕವಾಗಿದೆ. ದನಿ ಇಲ್ಲದವರ ದನಿಗೆ ಶಕ್ತಿ ತುಂಬುವ ಚಿಂತನೆ ಕೇವಲ ಚಿಂತನೆಯಾಗಿ ಉಳಿಯುತ್ತಿದೆ. ಖಾಸಗಿ, ಬಹುರಾಷ್ಟ್ರೀಯ, ಸ್ಥಳೀಯ ಸಂಸ್ಥೆಗಳಲ್ಲಿ ಮೀಸಲಾತಿ ಕಡ್ಡಾಯ ವಾಗಬೇಕೆಂದು ಅವರು ಪ್ರತಿಪಾದಿಸಿದರು. ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದ ಪುರಸಭಾಧ್ಯಕ್ಷ ಉಮರ್ ಫಾರೂಕ್ ಮಾತನಾಡಿ, ಟಿಪ್ಪು ಸುಲ್ತಾನ್ ತನ್ನ ಸೈನ್ಯದಲ್ಲಿ ಸಮಾನತೆ ಕಾಣಲು ಮೀಸಲಾತಿ ಜಾರಿಗೆ ತಂದಿದ್ದರು. ಆತ ಹಿಂದೂ-ಮುಸ್ಲಿಮ್ ಎಂಬ ಭೇದ ಭಾವವಿಲ್ಲದೆ ಆಡಳಿತ ನಡೆಸಿದ್ದರು. ಧರ್ಮಾಂಧತೆಯಿಂದ ಉಂಟಾಗುವ ಅವಘಡ ತಪ್ಪಿಸಲು ಸರ್ವ ಧರ್ಮದ ಪ್ರಾತಿನಿಧ್ಯದ ಅವಕಾಶದ ಅರ್ಥ ವ್ಯವಸ್ಥೆ ಜಾರಿಯಾಗ ಬೇಕೆಂದು ಅವರು ಅಭಿಪ್ರಾಯಿಸಿದರು.

ಪುರಸಭಾ ಸದಸ್ಯ ಮುಹಮ್ಮದ್ ಜಿಯಾವುಲ್ಲಾ ಕಾರ್ಯಕ್ರಮದ ಉದ್ಘಾಟನೆ ನೆರವೇರಿಸಿದರು. ಪುರಸಭಾ ಮಾಜಿ ಉಪಾಧ್ಯಕ್ಷ ಜಯಕುಮಾರ್ ವಿಚಾರ ಸಂಕಿರಣ ಉದ್ಘಾಟಿಸಿದರು. ದಸಂಸದ ವೆಂಕಟೇಶ ಕ್ರಾಂತಿಗೀತೆ ಹಾಡಿದರು. ಮುಹಮ್ಮದ್ ಯೂಸುಫ್, ಬಿಜೆಪಿ ಮುಖಂಡ ಟಿ.ಎಂ.ಭೋಜರಾಜ್, ಸುರೇಶ್ ಚಂದ್ರ, ದಾವೂದ್ ಸಾಬ್, ಅಮ್ಜದ್ ಪಾಷ, ಟಿಪ್ಪು ಸುಲ್ತಾನ್ ಯುವಕ ಸಂಘದ ಅಧ್ಯಕ್ಷ ದಾದಾಪೀರ್, ಸಮಿ ಅಹ್ಮದ್ ಮಾತನಾ ಡಿದರು.