ಅಫ್ರಿದಿ ಪಾಕಿಸ್ತಾನ ತಂಡಕ್ಕೆ ನಾಯಕ

ಕರಾಚಿ, ಮೇ 25: ಪಾಕಿಸ್ತಾನ ಟ್ವೆಂಟಿ 20 ಕ್ರಿಕೆಟ್ ತಂಡದ ನಾಯಕ ಶಾಹಿದ್ ಆಫ್ರಿದಿರನ್ನು ಏಕದಿನ, ಟೆಸ್ಟ್ ಮತ್ತು ಮುಂದಿನ ಏಷ್ಯಾಕಪ್ ಸರಣಿಗೆ ತಂಡದ ನಾಯಕರಾಗಿ ಆಯ್ಕೆ ಮಾಡಲಾಗಿದೆ.ತಂಡದ ಆಯ್ಕೆಯ ಬಗ್ಗೆ ಅಧಿಕೃತ ಘೋಷಣೆ ಇನ್ನೂ ಆಗಿಲ್ಲ. ಅಫ್ರಿದಿ ಮತ್ತು ತಂಡದ ಮ್ಯಾನೇಜರ್ ಯಾವರ್ ಸಯೀದ್ ಇಂದು ಪಿಸಿಬಿ ಅಧ್ಯಕ್ಷ ಸಲ್ಮಾನ್ ಬಟ್‌ರನ್ನು ಭೇಟಿಯಾಗಿ ರಾಷ್ಟ್ರೀಯ ಕ್ರೀಡಾ ಕ್ರೀಯಾ ಸಮಿತಿ ಸಭೆಯಲ್ಲಿ ನಿಷೇಧ ಹಾಗೂ ದಂಡ ವಿಧಿಸಲ್ಪಟ್ಟ ಆಟಗಾರರನ್ನು ಕೈಬಿಡುವಂತೆ ಕೈಗೊಂಡ ಶಿಫಾರಸುಗಳ ಬಗ್ಗೆ ಚರ್ಚೆ ನಡೆಯಿತು ಎಂದು ಅಧಿಕೃತ ಮೂಲಗಳು ತಿಳಿಸಿವೆ.

‘‘ನಿಷೇಧಕ್ಕೊಳಗಾಗಿರುವ ಯೂನುಸ್ ಖಾನ್ ಮತ್ತು ಶುಐಬ್ ಮಲಿಕ್‌ರನ್ನು ತಂಡಕ್ಕೆ ಸೇರಿಸಿ ಕೊಳ್ಳುವಲ್ಲಿ ಏನಾದರೂ ಸಮಸ್ಯೆ ಇದೆಯೇ ಎಂದು ಅಫ್ರಿದಿ ಬಟ್‌ರನ್ನು ಪ್ರಶ್ನಿಸಿದಾಗ ಅವರಿಗೆ ತಂಡಕ್ಕೆ ಸೇರ್ಪಡೆಗೆ ಸಮಸ್ಯೆ ಇದೆ ಎಂದು ಹೇಳಿದರೆಂದು ಅಧಿಕೃತ ಮೂಲಗಳಿಂದ ತಿಳಿದು ಬಂದಿದೆ.

2006ರ ಬಳಿಕ ಅಫ್ರಿದಿ ಟೆಸ್ಟ್‌ನಲ್ಲಿ ಆಡಿಲ್ಲ. ಇದೀಗ ಪ್ರಥಮ ಬಾರಿಗೆ ಆಲ್‌ರೌಂಡರ್ ಅಫ್ರಿದಿಗೆ ಟೆಸ್ಟ್ ತಂಡದ ನಾಯಕತ್ವವನ್ನು ವಹಿಸಿ ಕೊಡಲಾಗಿದೆ. ಅಫ್ರಿದಿ ಮತ್ತು ಬಟ್ ಬಳಿಕ ಗಡ್ಡಾಫಿ ಕ್ರೀಡಾಂಗಣದಲ್ಲಿ ಏಷ್ಯಾ ಕಪ್ ಮತ್ತು ಇಂಗ್ಲೆಂಡ್ ಪ್ರವಾಸಕ್ಕೆ 30 ಮಂದಿ ಸಂಭಾವ್ಯ ಆಟಗಾರರ ಆಯ್ಕೆಗೆ ಸಂಬಂಧಿಸಿ ಕರೆಯಲಾದ ರಾಷ್ಟ್ರೀಯ ಆಯ್ಕೆಗಾರರ ಸಮಿತಿ ಸಭೆಯಲ್ಲಿ ಭಾಗವಹಿಸಿದ್ದರು.

ವೇಗದ ಬೌಲರ್ ಶುಐಬ್ ಅಕ್ತರ್ ಈ ಬಾರಿ ತಂಡದಲ್ಲಿ ಸ್ಥಾನ ಪಡೆಯವ ವಿಶ್ವ್ವಾಸ ಹೊಂದಿದ್ದಾರೆ. ಪಾಕಿಸ್ತಾನ ತಂಡ ಏಷ್ಯಾ ಕಪ್ ಸರಣಿಯಲ್ಲಿ ಆಡಿದ ಬಳಿಕ ಆಸ್ಟ್ರೇಲಿಯದೊಂದಿಗೆ ಎರಡು ಟೆಸ್ಟ್ ಸರಣಿಯನ್ನು ಇಂಗ್ಲೆಂಡ್‌ನಲ್ಲಿ ಆಡಲಿದೆ. ಅನಂತರ ಇಂಗ್ಲೆಂಡ್ ವಿರುದ್ಧ ನಾಲ್ಕು ಟೆಸ್ಟ್ ಸರಣಿಯನ್ನು ಆಯೋಜಿಸಲಾಗಿದೆ.

ಕಳ್ಳಾಟ ನಡೆದಿಲ್ಲ

ಮೆಲ್ಬೋರ್ನ್, ಮೇ 25: ಸಿಡ್ನಿಯಲ್ಲಿ ನಡೆದ ಆಸ್ಟ್ರೇಲಿಯ ಮತ್ತು ಪಾಕಿಸ್ತಾನ ನಡುವಿನ ಟೆಸ್ಟ್ ವೇಳೆ ಕಳ್ಳಾಟ ನಡೆದಿದೆ ಎಂಬ ಗುಮಾನಿಯ ಬಗ್ಗೆ ಐಸಿಸಿಯು ತನಿಖೆೆ ನಡೆಸುತ್ತಿದ್ದು, ಐಸಿಸಿಯ ತನಿಖಾ ತಂಡಕ್ಕೆ ಈ ವರೆಗೆ ಈ ಬಗ್ಗೆ ಯಾವುದೆ ಸಾಕ್ಷಧಾರಗಳು ಸಿಕ್ಕಿಲ್ಲ ಎಂದು ಆಸ್ಟ್ರೆಲಿಯದ ಕ್ರಿಕೆಟ್ ವಕ್ತಾರ ಪೀಟರ್ ಯಂಗ್ ತಿಳಿಸಿದ್ದಾರೆ.

ಪಾಕಿಸ್ತಾನವು ಆಸ್ಟ್ರೇಲಿಯ ಪ್ರವಾಸದಲ್ಲಿ ಟೆಸ್ಟ್ ಮತ್ತು ಏಕದಿನ ಸರಣಿ ಮತ್ತು ಟ್ವೆಂಟಿ 20 ಪಂದ್ಯಗಳಲ್ಲಿ ಹೀನಾಯ ಸೋಲು ಅನುಭವಿಸಿತ್ತು. ಪಾಕಿಸ್ತಾನದ ವೈಫಲ್ಯದ ಬಗ್ಗೆ ಕೆಲವು ಆಟಗಾರರು ಕಳ್ಳಾಟದಲ್ಲಿ ಭಾಗಿಯಾಗಿರುವುದು ಕಾರಣ ಎಂಬ ಗುಮಾನಿ ವ್ಯಕ್ತವಾಗಿ ಪಾಕ್ ಕ್ರಿಕೆಟ್ ಮಂಡಳಿಯು ತನಿಖೆಗೆೆ ಆದೇಶಿಸಿತ್ತು