ಏರ್ ಇಂಡಿಯಾ ಎಕ್ಸ್ ಪ್ರೆಸ್‌ ದುರಂತ: ವಿಶ್ಲೇಷಣೆಗಾಗಿ ಸಿವಿಆರ್ ದಿಲ್ಲಿಗೆ

ಘಟನಾ ಸ್ಥಳಕ್ಕೆ ಅಮೆರಿಕದ ತಜ್ಞರ ಭೇಟಿ

ಹೊಸದಿಲ್ಲಿ,ಮೇ 24: ಮಂಗಳೂರು ವಿಮಾನದುರಂತದ ಕಾರಣಗಳ ಬಗ್ಗೆ ಮಹತ್ವದ ಸುಳಿವುಗಳನ್ನು ನೀಡಬಹುದಾದ ಕಾಕ್‌ಪಿಟ್ ವಾಯಿಸ್ ರೆಕಾರ್ಡರ್ (ಸಿವಿಆರ್) ಹಾಗೂ ಡಿಜಿಟಲ್ ಫ್ಲೈಟ್ ಡಾಟಾ ಎಕ್ವಿಸಿಶನ್ ಯೂನಿಟ್(ಡಿಎಫ್‌ಡಿಎಯು) ಸಹಿತ ವಿಮಾನದ ಕೆಲವು ಮಹತ್ವದ ಉಪಕರಣಗಳನ್ನು ಹೊಸದಿಲ್ಲಿಗೆ ಸದ್ಯದಲ್ಲೇ ತರಲಾಗುವುದು ಎಂದು ನಾಗರಿಕ ವಾಯುಯಾನ ಮಹಾನಿರ್ದೇಶನಾಲಯ (ಡಿಜಿಸಿಎ)ದ ಮೂಲಗಳು ಸೋಮವಾರ ತಿಳಿಸಿವೆ.

ವಿಮಾನದ ಕಾಕ್‌ಪಿಟ್‌ನಲ್ಲಿ ಪೈಲಟ್ ಮತ್ತಿತರರ ನಡುವೆ ನಡೆದ ಸಂಭಾಷಣೆಗಳನ್ನು ಧ್ವನಿಮುದ್ರಿಸಿಕೊಳ್ಳುವ ಸಿವಿಆರ್ ಮತ್ತಿತರ ಕೆಲವು ಉಪಕರಣಗಳನ್ನು ವಿಶ್ಲೇಷಣೆಗಾಗಿ ಡಿಜಿಸಿಎಗೆ ತರಲಾಗುವುದು ಎಂದು ಅಧಿಕೃತ ಮೂಲಗಳು ತಿಳಿಸಿವೆ.
ಸಿವಿಆರ್ ಹಾಗೂ ವಿಮಾನದ ಬಹುತೇಕ ತಾಂತ್ರಿಕ ವಿವರಗಳನ್ನು ನೀಡುವ ಡಿಎಫ್‌ಡಿಎಯುವನ್ನು ಏರ್‌ಇಂಡಿಯಾ ಎಕ್ಸ್‌ಪ್ರೆಸ್‌ನ ಅವಶೇಷಗಳಡಿಯಲ್ಲಿ ರವಿವಾರ ಹೆಕ್ಕಿ ತೆಗೆಯಲಾಗಿತ್ತು. ಸುಟ್ಟುಹೋಗಿರುವ ಸ್ಥಿತಿಯಲ್ಲಿರುವ ಅವುಗಳ ವಿಶ್ಲೇಷಣೆಯನ್ನು ಡಿಜಿಸಿಎನ ವಾಯುಸುರಕ್ಷತೆ ವಿಭಾಗದ ಅಧಿಕಾರಿಗಳು ನಡೆಸಲಿದ್ದಾರೆ.

ಸಿವಿಆರ್ ವಿಮಾನದ ಹಾರಾಟದ ವೇಳೆ ಕಾಕ್‌ಪಿಟ್‌ನಲ್ಲಿ ರೇಡಿಯೋ ತರಂಗಗಳ ಪ್ರಸಾರವನ್ನು ಹಾಗೂ ಪೈಲಟ್‌ಗಳ ಧ್ವನಿಯನ್ನು ಹಾಗೂ ಎಂಜಿನ್ ಶಬ್ದವನ್ನು ಧ್ವನಿಮುದ್ರಿಸಿಕೊಳ್ಳುತ್ತದೆ. ಇನ್ನು ಡಿಎಫ್‌ಡಿಎಯು ವಿಮಾನದ ಅಲ್ಪಾವಧಿಯ ಹಾರಾಟದ ಕೆಲವು ತಾಂತ್ರಿಕ ಮಾನದಂಡಗಳನ್ನು ದಾಖಲಿಸಿ ಕೊಳ್ಳುತ್ತದೆ. ಆದರೆ ಈ ಎರಡೂ ಉಪಕರಣಗಳು ಹಾನಿಗೀಡಾಗಿರುವುದರಿಂದ, ಸಿವಿಆರ್‌ನ ಇಲೆಕ್ಟ್ರಾನಿಕ್ ಚಿಪ್‌ಗಳನ್ನು ತೆಗೆದು ಅವನ್ನು ಬೇರೊಂದು ಕಾರ್ಯಯೋಗ್ಯ ಘಟಕದಲ್ಲಿ ಇರಿಸಿ, ಮಾಹಿತಿಯನ್ನು ಪಡೆಯಲು ಯತ್ನಿಸಲಾಗುವುದು ಎಂದು ಮೂಲಗಳು ಹೇಳಿವೆ.

ಸಿವಿಎರ್ ಹಾಗೂ ಡಿಎಫ್‌ಡಿಎಯುವಿನ ವಿಶ್ಲೇಷಣೆಗೆ ಕನಿಷ್ಠ ಹದಿನೈದು ದಿನ ತಗಲಲಿದೆಯೆಂದು ಅವು ಹೇಳಿವೆ.
ಏತನ್ಮಧ್ಯೆ ಬಜ್ಪೆ ವಿಮಾನನಿಲ್ದಾಣದ ವೈಮಾನಿಕ ಸಂಚಾರ ನಿಯಂತ್ರಣ ಕೊಠಡಿ ಹಾಗೂ ದುರಂತಕ್ಕೀಡಾದ ಬೋಯಿಂಗ್ 737-800ರ ಪೈಲಟ್‌ಗಳ ನಡುವೆ ನಡೆದಿರುವ ಧ್ವನಿಮುದ್ರಿತ ಸಂಭಾಷಣೆಗಳ ವಿಶ್ಲೇಷಣೆಯನ್ನು ತಜ್ಞರ ತಂಡವು ನಡೆಸಿದೆಯೆಂದು ಅವು ತಿಳಿಸಿವೆ.

ವಿಮಾನ ದುರಂತದ ತನಿಖೆ ನಡೆಸುತ್ತಿರುವ ನಾಲ್ಕು ತಂಡಗಳ ತಜ್ಞರು ವಿಮಾನದ ಅವಶೇಷಗಳು ಚದುರಿಬಿದ್ದಿರುವ ಸ್ಥಳದಲ್ಲಿ, ವಿಮಾನನಿಲ್ದಾಣ ರನ್‌ವೇ ಮತ್ತಿತರ ಸ್ಥಳಗಳಲ್ಲಿ ಶೋಧ ಕಾರ್ಯ ನಡೆಸಿದವು ಎಂದು ಡಿಜಿಸಿಎ ಮೂಲಗಳು ತಿಳಿಸಿವೆ. ಈ ಮಧ್ಯೆ ವಿಮಾನ ದುರಂತದ ತನಿಖೆಯಲ್ಲಿ ನೆರವಾಗಲು ಮಂಗಳೂರಿಗೆ ಆಗಮಿಸಿರುವ ಅಮೆರಿಕದ ಕೆನ್ಯೊನ್ ಸಂಸ್ಥೆಯ ತಜ್ಞರು ಇಂದು ವಿಮಾನ ದುರಂತದ ಸ್ಥಳದಲ್ಲಿ ಪರಿಶೀಲನೆ ನಡೆಸಿದರು.