ಜವಾಬ್ದಾರಿ ಪೂರ್ಣಗೊಳಿಸದೆ ನಿವೃತ್ತಿಯ ಪ್ರಶ್ನೆಯೇ ಇಲ್ಲ: ಪ್ರಧಾನಿ

ಎರಡನೆ ಅವಧಿಯ ಒಂದು ವರ್ಷ ಪೂರೈಸಿದ ಕೇಂದ್ರದ ಯುಪಿಎ

ಹೊಸದಿಲ್ಲಿ, ಮೇ 24: ಕಾಂಗ್ರೆಸ್ ನೇತೃತ್ವದ ಯುಪಿಎ ಸರಕಾರ ಒಂದು ವರ್ಷ ಪೂರೈಸಿದ ಹಿನ್ನೆಲೆಯಲ್ಲಿ ಇಂದು ಹಮ್ಮಿಕೊಂಡಿದ್ದ ಪತ್ರಕರ್ತರೊಂದಿಗಿನ ಸಂವಾದದಲ್ಲಿ ಪ್ರಧಾನ ಮಂತ್ರಿ ಮನಮೋಹನ ಸಿಂಗ್, ರಾಜತಾಂತ್ರಿಕ ವಿಷಯಗಳಿಂದ ಹಿಡಿದು ಮನೆಯ ವಿಷಯಗಳವರೆಗೂ ಎಲ್ಲ ಪ್ರಶ್ನೆಗಳಿಗೂ ಬಹಳ ಸಾವಧಾನವಾಗಿ ಉತ್ತರಿಸಿದರು.

77 ವರ್ಷದ ಪ್ರಧಾನಿ ಮನಮೋಹನ ಸಿಂಗ್, ತನ್ನ ನಿವೃತ್ತಿಯ ಬಗ್ಗೆ ಕೇಳಲಾದಾಗ ಬಹಳ ನಾಜೂಕಿನಿಂದ ಉತ್ತರಿಸಿ, ತನಗೆ ವಹಿಸಿಕೊಡಲಾದ ಜವಾಬ್ದಾರಿಗಳನ್ನು ಪೂರ್ಣಗೊಳಿಸುವ ಮುಂಚೆಯೇ ಹೊರಹೋಗುವ ಪ್ರಶ್ನೆ ಉದ್ಭವವಾಗುವುದಿಲ್ಲ ಎಂದು ಸ್ಪಷ್ಟಪಡಿಸಿದರು.

ರಾಹುಲ್ ಗಾಂಧಿ ಪ್ರಧಾನಿಯಾಗು ವುದಕ್ಕೆ ತಾವು ದಾರಿ ಸುಗಮಗೊಳಿ ಸುತ್ತೀರಾ ಎಂದು ಕೇಳಲಾದ ಪ್ರಶ್ನೆಗೆ ಬಹಳ ಹಗುರವಾಗಿಯೇ ಉತ್ತರಿಸಿದ ಸಿಂಗ್, ಕಾಂಗ್ರೆಸ್ ಪಕ್ಷ ತೆಗೆದುಕೊಳ್ಳುವ ಯಾವುದೇ ನಿರ್ಧಾರವನ್ನು ನಾನು ಸಂತೋಷದಿಂದಲೇ ಸ್ವಾಗತಿಸುತ್ತೇನೆ ಎಂದು 75 ನಿಮಿಷಗಳ ಕಾಲ ನಡೆದ ಸಂವಾದದಲ್ಲಿ ಹೇಳಿದರು.

ನಿಮ್ಮ ಪತ್ನಿ ಗುರುಶನ್ ಕೌರ್ ಮತ್ತು ಕಾಂಗ್ರೆಸ್ ಅಧ್ಯಕ್ಷೆ ಸೋನಿಯಾ ಗಾಂಧಿ ಇವರಿಬ್ಬರ ನಡುವೆ ಯಾರ ಸಲಹೆಗೆ ಹೆಚ್ಚು ಮಹತ್ವ ನೀಡುತ್ತೀರಿ ಎಂದು ಕೇಳಲಾದಾಗ, ಬಹಳ ತಂತ್ರಗಾರಿಕೆ ಯಿಂದಲೇ ಉತ್ತರಿಸಿದ ಸಿಂಗ್, ಇಬ್ಬರೂ ವಿಭಿನ್ನ ವಿಷಯಗಳನ್ನು ನಿಭಾಯಿಸುತ್ತಿದ್ದಾರೆ ಹಾಗೂ ಇಬ್ಬರ ಸಲಹೆಗಳನ್ನೂ ನಾನು ಸ್ವಾಗತಿಸುತ್ತೇನೆ ಎಂದು ವಿಜ್ಞಾನ ಭವನದ ಪ್ಲಾನರಿ ಸಭಾಂಗಣದಲ್ಲಿ ನಡೆದ ಸಂವಾದದಲ್ಲಿ ಹೇಳಿದರು.

ತನ್ನ ಸಹೋದ್ಯೋಗಿ ಮಿತ್ರರ ಮತ್ತು ಇತರ ಹಲವು ಪ್ರಶ್ನೆಗಳಿಗೂ ಅವರು ಉತ್ತರಿಸಿದರು.

ಮುಸ್ಲಿಮರ ಅಭಿವೃದ್ಧಿಗೆ ಪ್ರಾಮಾಣಿಕ ಪ್ರಯತ್ನ: ಶಿಕ್ಷಣದಲ್ಲಿ ಮುಸ್ಲಿಮರ ಪಾಲು ದಾರಿಕೆ ತೀರಾ ಕೆಳಮಟ್ಟದಲ್ಲಿದೆ ಎಂದು ಹೇಳಿರುವ ಪ್ರಧಾನಿ, ಅವರ ಅಭಿವೃದ್ಧಿಗೆ ಸರಕಾರ ಪ್ರಮಾಣಿಕ ಪ್ರಯತ್ನ ಮಾಡಲಿದೆ ಎಂದು ಹೇಳಿದರು.

ಸೂಕ್ತ ವೇದಿಕೆಯಲ್ಲಿ ಚರ್ಚೆ
ಗೃಹ ಸಚಿವ ಪಿ.ಚಿದಂಬರಂ ಹೇಳಿ ರುವ ‘ಸೀಮಿತ ತೀರ್ಪು’ ಕುರಿತ ಹೇಳಿಕೆ ನೀಡಿರುವ ಪ್ರಧಾನಿ ಮನಮೋಹನ ಸಿಂಗ್, ಈ ಬಗ್ಗೆ ಸೂಕ್ತ ವೇದಿಕೆಯಾದ ಕ್ಯಾಬಿನೆಟ್‌ನಲ್ಲಿ ಚರ್ಚೆ ನಡೆಸಲಾಗು ವುದು ಎಂದರು.

ನಕ್ಸಲ್ ಸಮಸ್ಯೆಯ ಕುರಿತು ಗೃಹ ಸಚಿವ ಪಿ.ಚಿದಂಬರಂ ಹೇಳಿದ ‘ ಸೀಮಿತ ತೀರ್ಪು’ ವಿಷಯದ ಬಗ್ಗೆ ಕೇಳಲಾದ ಪ್ರಶ್ನೆಗೆ ಉತ್ತರಿಸಿದ ಸಿಂಗ್, ಈ ಬಗ್ಗೆ ಗೃಹ ಸಚಿವರು ವಿವರಿಸಿದ್ದಾರೆ. ಇದು ಯುದ್ಧಕ್ಕೆ ಸಂಬಂಧಿಸಿದ ವಿಷಯ, ಆದ್ದರಿಂದ ಸೂಕ್ತ ವೇದಿಕೆಗಳಲ್ಲಿ ಅದನ್ನು ನಾವು ಚರ್ಚಿಸುತ್ತೇವೆ’ ಎಂದು ಹೇಳಿದರು.

ನಕ್ಸಲರು ದೇಶದ ಆಂತರಿಕ ಭದ್ರತೆಗೆ ಸವಾಲಾಗಿದ್ದಾರೆ. ಅವರನ್ನು ನಿಯಂತ್ರಿ ಸುವುದು ಆಯಾಯ ರಾಜ್ಯಸರಕಾರದ ಜವಾಬ್ದಾರಿ. ಆದರೆ, ಕೇಂದ್ರ ಅಂತಹ ರಾಜ್ಯಗಳಿಗೆ ಸಹಾಯ ಮಾಡಲಿದೆ ಎಂದು ಪ್ರಧಾನಿ ಹೇಳಿದರು.

ದೇಶದ ಬೆಳವಣಿಗೆಗೆ ನಕ್ಸಲರ ಮೇಲೆ ನಿಯಂತ್ರಣ ಸಾಧಿಸಲೇ ಬೇಕಾದ ಅಗತ್ಯ ಇದೆ ಎಂದ ಸಿಂಗ್, ನಕ್ಸಲರ ಬಗ್ಗೆ ನಾವು ಕೀಳಂದಾಜಿಸಿಲ್ಲ ಎಂದು ಹೇಳಿದರು.
‘ನಕ್ಸಲ್ ಸಮಸ್ಯೆಯ ಬಗ್ಗೆ ಹಲವು ಬಾರಿ ಹಲವು ರಾಜ್ಯಗಳ ಮುಖ್ಯ ಮಂತ್ರಿಗಳೊಂದಿಗೆ ನಾನು ಮಾತನಾಡಿದ್ದೇನೆ. ದೇಶದ ಅಭಿವೃದ್ಧಿಗೆ ನಕ್ಸಲರ ವಿರುದ್ಧ ನಿಯಂತ್ರಣ ಹೇರ ಬೇಕೆಂಬುದನ್ನು ಮುಖ್ಯಮಂತ್ರಿಗಳು ಅರ್ಥ ಮಾಡಿಕೊಂಡಿದ್ದಾರೆ’ ಎಂದು ಸಿಂಗ್ ಹೇಳಿದರು.

ಹೊಸ ರಾಜ್ಯಗಳ ರಚನೆ ಇಲ್ಲ: ಹೊಸ ರಾಜ್ಯಗಳ ರಚನೆಯ ಬಗ್ಗೆ ಸರಕಾರದ ಮುಂದೆ ಯಾವುದೇ ಪ್ರಸ್ತಾಪ ಇಲ್ಲ ಎಂದು ಹೇಳಿದ ಪ್ರಧಾನಿ ಮನಮೋಹನ ಸಿಂಗ್, ತೆಲಂಗಾಣ ರಾಜ್ಯದ ಬೇಡಿಕೆಯ ಬಗ್ಗೆ ಸಮಿತಿಯ ವರದಿಯನ್ನು ಕಾಯುತ್ತಿದ್ದೇವೆ ಎಂದರು.

ನ್ಯಾಯಮೂರ್ತಿ ಬಿ.ಕೆ. ಶ್ರೀಕೃಷ್ಣ ಸಮಿತಿಯ ರಾಜ್ಯ ರಚನೆಯ ಶಿಫಾರಸುಗಳ ಪ್ರಕಾರ ಬಾಕಿಯಿರುವ ರಾಜ್ಯಗಳ ರಚನೆಯ ಬಗ್ಗೆ ಪ್ರತಿಕ್ರಿಯೆ ನೀಡಲು ಅವರು ನಿರಾಕರಿಸಿದರು.
ಕೇಂದ್ರ ಮೂಕ ಪ್ರೇಕ್ಷಕನಲ್ಲ: ರಾಜ್ಯಗಳ ನಡುವಿನ ಜಲ ವಿವಾದಗಳ ಬಗ್ಗೆ ಕೇಂದ್ರ ಸರಕಾರ ‘ಮೂಕ ಪ್ರೇಕ್ಷಕ’ನಾಗಿದೆ ಎಂಬ ತಮಿಳುನಾಡು ಮುಖ್ಯಮಂತ್ರಿ ಎಂ.ಕರುಣಾನಿಧಿ ಯವರ ವಾದವನ್ನು ಪ್ರಧಾನಿ ಮನಮೋಹನ್ ಸಿಂಗ್ ತಳ್ಳಿಹಾಕಿದ್ದಾರೆ. ಜಲವಿವಾದವನ್ನು ಬಗೆಹರಿಸಲು ಕೇಂದ್ರ ಸರಕಾರ ಕಾತರದಿಂದಿದೆ ಎಂದು ಅವರು ಹೇಳಿದರು.

ಅಫ್ಝಲ್‌ಗೆ ಕಾನೂನು ಪ್ರಕಾರ ಶಿಕ್ಷೆ: ಪಾರ್ಲಿಮೆಂಟ್ ದಾಳಿಯ ಅಪರಾಧ ದಲ್ಲಿ ಗಲ್ಲುಶಿಕ್ಷೆಗೆ ಗುರಿಯಾಗಿರುವ ಅಫ್ಝಲ್ ಗುರುವಿಗೆ ನೆಲದ ಕಾನೂನಿನ ಪ್ರಕಾರವೇ ಶಿಕ್ಷೆ ವಿಧಿಸಲಾಗುವುದು ಎಂದು ಪ್ರಧಾನಿ ಮನಮೋಹನ ಸಿಂಗ್ ಹೇಳಿದರು.

ಸಾಧನೆಯಲ್ಲಿ ತೃಪ್ತಿ ಇಲ್ಲ: ಯುಪಿಎ ಸರಕಾರ ಒಂದ ವರ್ಷದಲ್ಲಿ ‘ಯೋಗ್ಯ ಸಾಧನೆ’ ಮಾಡಿದೆ. ಇದಕ್ಕಿಂತಲೂ ಹೆಚ್ಚಿನದನ್ನು ಯುಪಿಎ ಸರಕಾರ ಮಾಡಲಿದೆ ಎಂದು ಸಿಂಗ್ ಹೇಳಿದರು.
‘ಏನನ್ನು ನಾವು ಸಾಧಿಸಿದ್ದೇವೆಯೋ ಅದರಲ್ಲಿ ನಮಗೆ ತೃಪ್ತಿ ಇಲ್ಲ’ ಎಂದು ಅವರು ಹೇಳಿದರು.

ಅಪನಂಬಿಕೆ ಇಲ್ಲ: ಸೋನಿಯಾ ಗಾಂಧಿಯವರ ಬಗ್ಗೆ ತನಗೆ ಅಪನಂಬಿಕೆ ಇದೆ ಎಂಬ ವಾದವನ್ನು ತಳ್ಳಿಹಾಕಿದ ಪ್ರಧಾನಿ, ಅವರಿಂದ ನಾನು ಹಲವಾರು ಮಾರ್ಗದರ್ಶನ ಮತ್ತು ಸಲಹೆಗಳನ್ನು ಪಡೆದಿದ್ದೇನೆ ಎಂದರು.

‘ಸೋನಿಯಾಗಾಂಧಿ ಮತ್ತು ತನ್ನ ನಡುವೆ ಯಾವುದೇ ಭಿನ್ನಾಭಿಪ್ರಾಯ ಗಳಿಗೆ ಆಸ್ಪದವೇ ಇಲ್ಲ... ಅವರು ಯುಪಿಎ ಮತ್ತು ಕಾಂಗ್ರೆಸ್ ಪಕ್ಷದ ಅಧ್ಯಕ್ಷೆ...ನಾನು ಕಾಂಗ್ರೆಸಿಗ’ ಎಂದು ಪಕ್ಷ ಮತ್ತು ಸರಕಾರದ ನಡುವಿನ ವ್ಯತ್ಯಾಸದ ಬಗ್ಗೆ ಕೇಳಿದಾಗ ಹೇಳಿದರು.

ಪ್ರಧಾನಿ ಸ್ಥಾನಕ್ಕೆ ಯುವಕರನ್ನು ತರಲು ಕಾಂಗ್ರೆಸ್ ಪಕ್ಷ ಇಚ್ಛಿಸಿದರೆ ತಾನು ಅದಕ್ಕಾಗಿ ದಾರಿ ಸುಗಮಗೊಳಿ ಸಲು ಸದಾ ಸಿದ್ಧ ಎಂದು ಅವರು ಹೇಳಿದರು.
‘‘ನನಗೆ ವಹಿಸಿರುವ ಹಲವು ಕೆಲಸಗಳು ಬಾಕಿ ಇದ್ದು, ಅವುಗಳನ್ನು ಪೂರ್ಣಗೊಳಿಸದೆ ನಿವೃತ್ತಿಯಾಗು ವುದಿಲ್ಲ’ ಎಂದು ಹೇಳಿದರು.

ಎನ್‌ಸಿಎ ಸೂಪರ್ ಕ್ಯಾಬಿನೆಟ್ ಅಲ್ಲ: ಯುಪಿಎ ಅಧ್ಯಕ್ಷೆ ಸೋನಿಯಾ ಗಾಂಧಿ ನೇತೃತ್ವದ ರಾಷ್ಟ್ರೀಯ ಸಲಹಾ ಮಂಡಳಿ(ಎನ್‌ಸಿಎ) ‘ಸೂಪರ್ ಕ್ಯಾಬಿನೆಟ್’ಅಲ್ಲ. ಅದೊಂದು ಸಲಹಾ ಮಂಡಳಿಯಾಗಿದ್ದು, ಸಾಮಾಜಿಕ ಅಭಿವೃದ್ಧಿ ಕಾರ್ಯಕ್ರಮಗಳಿಗೆ ಹಲವು ಕೊಡುಗೆಗಳನ್ನು ಕೊಟ್ಟಿದೆ ಎಂದು ಪ್ರಧಾನಿ ಮನಮೋಹನ್‌ಸಿಂಗ್ ಹೇಳಿದರು.

ಹಿಂದಿನ ಎನ್‌ಡಿಎ ಸರಕಾರದ ನೀತಿಗಳನ್ನು ದೂರ ಸಂಪರ್ಕ ಸಚಿವ ಎ.ರಾಜಾ ಅನುಸರಿಸಿದ್ದಾರೆ ಎಂದು ಹೇಳಿದ ಪ್ರಧಾನಿ, ರಾಜಾರನ್ನು ಸಂಪುಟದಿಂದ ತೆಗೆದುಹಾಕುವ ಕುರಿತ ಸಲಹೆಯನ್ನು ತಳ್ಳಿಹಾಕಿದ್ದಾರೆ.

ಜಮ್ಮುಕಾಶ್ಮೀರದಲ್ಲಿರುವ ಎಲ್ಲ ಗುಂಪುಗಳೊಂದಿಗೂ ಮಾತುಕತೆಗೆ ಕೇಂದ್ರ ಸರಕಾರ ಸಿದ್ಧವಿದೆ ಎಂದು ಪ್ರಧಾನಿ ಹೇಳಿದರು.

ಅಮೆರಿಕ ಉನ್ನತ ಅಧಿಕಾರಿ ಗಳೊಂದಿಗೆ ಮಾತುಕತೆ ನಡೆಸಿ 26/11ರ ಪಿತೂರಿದಾರ ಡೇವಿಡ್ ಹೆಡ್ಲಿಯೊಂದಿಗೆ ಸಂಪರ್ಕ ಸಾಧಿಸಲು ಪ್ರಯತ್ನಿಸಲಾಗುತ್ತಿದೆ ಎಂದು ಪ್ರಧಾನಿ ಮನಮೋಹನ್ ಸಿಂಗ್ ಹೇಳಿದರು.

ವಿಶ್ವಾಸದ ಕೊರತೆಯೇ ಭಾರತ-ಪಾಕಿಸ್ತಾನದ ನಡುವೆ ದ್ವಿಪಕ್ಷೆಯ ಮಾತುಕತೆಗೆ ದೊಡ್ಡ ತೊಂದರೆಯಾಗಿದೆ ಎಂದು ಪ್ರದಾನಿ ಸಿಂಗ್ ಹೇಳಿದರು.
ದ್ವಿಪಕ್ಷೀಯ ಸಂಬಂಧ ವೃದ್ಧಿಗೆ ಭಾರತ ತಯಾರಿದ್ದು, ಪಾಕಿಸ್ತಾನ ನಮ್ಮ ನೆರೆಯ ರಾಷ್ಟ್ರ. ನೆರೆಯ ರಾಷ್ಟ್ರ ದೊಂದಿಗೆ ಉತ್ತಮ ಸಂಬಂಧವಿರಿಸದೆ ದೇಶದ ಸಂಪೂರ್ಣ ಅಭಿವೃದ್ಧಿ ಸಾಧ್ಯವಿಲ್ಲ ಎಂದು ಅವರು ಅಭಿಪ್ರಾಯಪಟ್ಟರು.

ಐಪಿಎಲ್‌ನಲ್ಲಿ ತಪ್ಪು ಸಂಭವಿಸಿ ರುವುದು ತನಿಖೆಯಲ್ಲಿ ಕಂಡುಬಂದರೆ ಸೂಕ್ತ ಕೈಗೊಳ್ಳಲಾಗು ವುದು ಎಂದು ಪ್ರಧಾನಿ ಹೇಳಿದ್ದಾರೆ.