ಶಾಂತಿ ಮಾತುಕತೆಯ ಪ್ರಗತಿ ಇಸ್ರೇಲನ್ನು ಅವಲಂಬಿಸಿದೆ: ಅಬ್ಬಾಸ್

ಜೆರುಸಲೇಂ, ಮೇ 25: ಈ ತಿಂಗಳ ಮೊದಲ ಭಾಗದಲ್ಲಿ ಆರಂಭಗೊಂಡಿರುವ ಪರೋಕ್ಷ ಶಾಂತಿ ಮಾತುಕತೆಯ ಪ್ರಗತಿಯು ಇಸ್ರೇಲನ್ನು ಅವಲಂಬಿಸಿದೆ ಎಂದು ಫೆಲೆಸ್ತೀನಿನ ಪ್ರಧಾನಿ ಮಹ್ಮೂದ್ ಅಬ್ಬಾಸ್ ವಿಯೆಟ್ನಾಮ್‌ಗೆ ಅಧಿಕೃತ ಭೇಟಿ ನೀಡಿದ ವೇಳೆ ಮಂಗಳವಾರ ತಿಳಿಸಿದ್ದಾರೆ. ‘‘ಪ್ರಗತಿಯನ್ನು ಸಾಧಿಸುವ ಬಗ್ಗೆ ನಮಗೆ ನಂಬಿಕೆಯಿದೆ.

ಅದು ಇಸ್ರೇಲ್‌ನ ನಾಗರಿಕರನ್ನು ಅವಲಂಬಿಸಿದೆ’’ ಎಂದು ವಿಯೆಟ್ನಾಮ್‌ನ ಅಧ್ಯಕ್ಷ ಎಂಜುಯೆನ್ ಮಿನ್ಹ್ ಟ್ರಿಯೆಟ್‌ರೊಂದಿಗೆ ಮಾತುಕತೆ ನಡೆಸಿದ ಬಳಿಕ ವಿವರ ನೀಡಿದ ಅಬ್ಬಾಸ್ ಹೇಳಿದ್ದಾರೆ. ಪರೋಕ್ಷ ಮಾತುಕತೆಗಳಿಗೆ ಮೊದಲಿಗೆ ಮಾರ್ಚ್‌ನಲ್ಲೇ ಅನುಮತಿ ನೀಡಲಾಗಿತ್ತಾದರೂ, ಪೂರ್ವ ಜೆರುಸಲೇಂನಲ್ಲಿ ಇಸ್ರೇಲ್ 1,600 ವಸಾಹತುಗಳನ್ನು ನಿರ್ಮಿಸುವ ಯೋಜನೆ ಪ್ರಕಟಿಸಿದ ಕೆಲವೇ ದಿನಗಳಲ್ಲಿ ಅವು ಆರಂಭದ ಹಂತದಲ್ಲೇ ಮುರಿದು ಬಿದ್ದಿದ್ದವು.

ಯೋಜನೆಯನ್ನು ಸ್ಥಗಿತಗೊಳಿಸುವ ಬಗ್ಗೆ ಅಮೆರಿಕದಿಂದ ಭರವಸೆ ದೊರೆತ ಬಳಿಕ ಮಾತುಕತೆ ಆರಂಭಿಸಲು ಫೆಲೆಸ್ತೀನಿಯರು ವಾಸ್ತವಿಕ ಒಪ್ಪಿಗೆ ನೀಡಿದ್ದರು. ಶಾಂತಿ ಒಪ್ಪಂದ ಸಾಧಿಸುವ ಪ್ರಯತ್ನಗಳಿಗೆ ಅಡ್ಡಿಯಾಗಿರುವ ಹಲವು ಸವಾಲುಗಳಲ್ಲಿ ಜೆರುಸಲೇಂ ಹಾಗೂ ಯಹೂದಿ ವಸಾಹತು ನಿರ್ಮಾಣವು ಒಂದಾಗಿದೆ. ಪರೋಕ್ಷ ಮಾತುಕತೆಯ ಭಾಗವಾಗಿ, ಕಳೆದ ಬುಧವಾರ ಮಹ್ಮೂದ್ ಅಬ್ಬಾಸ್ ಹಾಗೂ ಅಮೆರಿಕದ ರಾಯಭಾರಿ ಜಾರ್ಜ್ ಮಿಶೆಲ್ ತಮ್ಮ ಮೊದಲ ಮಾತುಕತೆ ನಡೆಸಿದ್ದರು.

ಕಳೆದ ಸೋಮವಾರ ಟಿವಿ ಸಂದರ್ಶನವೊಂದಕ್ಕೆ ಪ್ರತಿಕ್ರಿಯಿಸಿದ್ದ ಅಬ್ಬಾಸ್, ತಾನು ಮುಂದಿನ ತಿಂಗಳು ವಾಶಿಂಗ್ಟನ್‌ಗೆ ಭೇಟಿ ನೀಡುವ ಸಾಧ್ಯತೆಯಿದೆ ಎಂದು ತಿಳಿಸಿದ್ದರು. ಇಸ್ರೇಲಿ ನಗರಗಳನ್ನು ಗುರಿಯಾಗಿಸಿ ಫೆಲೆಸ್ತೀನಿಯರು ನಡೆಸಿದ ರಾಕೆಟ್ ದಾಳಿಯನ್ನು ಸ್ಥಗಿತಗೊಳಿಸಲು ಇಸ್ರೇಲ್ ಗಾಝಾಪಟ್ಟಿಯ ಮೇಲೆ ಸಮರ ಸಾರಿದ ವೇಳೆ 2008ರಲ್ಲಿ ಉಭಯ ಪಕ್ಷಗಳ ನಡುವಿನ ಕೊನೆಯ ಸುತ್ತಿನ ನೇರ ಮಾತುಕತೆಗಳು ಮುರಿದು ಬಿದ್ದಿದ್ದವು.