ಚೀನ: ಪಾಕ್‌ಗೆ 4 ತರಬೇತಿ ವಿಮಾನ ಪೂರೈಸಲು ಸಮ್ಮತಿ

ಇಸ್ಲಾಮಾಬಾದ್, ಮೇ 25: ಇಸ್ಲಾಮಾಬಾದ್‌ನೊಂದಿಗೆ ತನ್ನ ನಿಕಟ ಸಂಬಂಧವನ್ನು ಭದ್ರಗೊಳಿಸಲು ಬಯಸಿರುವ ಚೀನವು ಪಾಕಿಸ್ತಾನದ ವಾಯುಪಡೆಗೆ ನಾಲ್ಕು ತರಬೇತಿ ವಿಮಾನಗಳನ್ನು ಒದಗಿಸಲು ಒಪ್ಪಿಗೆ ನೀಡಿದೆ. ಪಾಕ್‌ನ ರಕ್ಷಣಾ ಸಚಿವ ಚೌಧರಿ ಅಹ್ಮದ್ ಮುಖ್ತಾರ್ ಹಾಗೂ ಚೀನದ ರಕ್ಷಣಾ ಸಚಿವ ಜನರಲ್ ಲಿಯಾಂಗ್ ಗುವಾಂಗ್‌ಲೀ ನಡುವೆ ನಡೆದ ಮಾತುಕತೆಯ ವೇಳೆ ಕೈಗೊಳ್ಳಲಾದ ನಿರ್ಧಾರವನ್ನು ಅನುಷ್ಠಾನಗೊಳಿಸುವ ಒಪ್ಪಂದಗಳಿಗೆ ಸಹಿ ಹಾಕಲಾಗಿದೆ.

ಚೀನವು ಪಾಕಿಸ್ತಾನ ವಾಯುಪಡೆಗೆ ನಾಲ್ಕು ತರಬೇತಿ ವಿಮಾನಗಳನ್ನು ಒದಗಿಸಲಿದೆ. ವಿವಿಧ ತರಬೇತಿ ಕಾರ್ಯಕ್ರಮಗಳಿಗೆ ಅದು 8.78 ದಶಲಕ್ಷ ಅಮೆರಿಕನ್ ಡಾಲರ್ ಮೊತ್ತವನ್ನು ವಿನಿಯೋಗಿಸಲಿದೆ. ದ್ವಿಪಕ್ಷೀಯ ರಕ್ಷಣಾ ಸಹಕಾರ, ಪ್ರದೇಶದಲ್ಲಿನ ಭೌಗೋಳಿಕ ವ್ಯೆಹಾತ್ಮಕ ಸನ್ನಿವೇಶ ಹಾಗೂ ಪಾಕಿಸ್ತಾನದ ಭಯೋತ್ಪಾದನೆ ವಿರೋಧಿ ಕ್ರಮಗಳ ಕುರಿತು ಉಭಯ ನಾಯಕರು ಚರ್ಚೆ ನಡೆಸಿದ್ದಾರೆ.

ಉಭಯ ರಾಷ್ಟ್ರಗಳು ವಿವಿಧ ಹಂತಗಳಲ್ಲಿ ಎದುರಿಸುತ್ತಿರುವ ಸವಾಲುಗಳನ್ನು ಎದುರಿಸುವಲ್ಲಿ ಸೇನಾ ಸಹಕಾರ ಹಾಗೂ ವ್ಯೆಹಾತ್ಮಕ ಸಂಪರ್ಕವನ್ನು ಹೆಚ್ಚಿಸುವುದಕ್ಕೆ ಸಂಬಂಧಿಸಿದಂತೆ ಉಭಯ ಪಕ್ಷಗಳು ಸಮ್ಮತಿ ಸೂಚಿಸಿವೆ. ಚೀನವು ಪಾಕಿಸ್ತಾನಕ್ಕೆ ಶಸ್ತ್ರಾಸ್ತ್ರಗಳನ್ನು ಪೂರೈಸುವ ಅತ್ಯಂತ ದೊಡ್ಡ ರಾಷ್ಟ್ರವಾಗಿದೆ.