ಕ್ಷಮಾದಾನ ಅರ್ಜಿಯ ತುರ್ತು ವಿಲೇವಾರಿಗೆ ಅಫ್ಝಲ್ ಆಗ್ರಹ

ಹೊಸದಿಲ್ಲಿ, ಮೇ 26: ತನ್ನ ಕ್ಷಮಾದಾನ ಅರ್ಜಿಯ ಕುರಿತಾಗಿ ಶೀಘ್ರ ನಿರ್ಧಾರ ಕೈಗೊಳ್ಳುವಂತೆ ಸಂಸತ್ ದಾಳಿ ಪ್ರಕರಣದಲ್ಲಿ ಮರಣ ದಂಡನೆ ಎದುರಿಸುತ್ತಿರುವ ಅಫ್ಜಲ್ ಗುರು ಸುಪ್ರೀಂ ಕೋರ್ಟ್ಗೆ ಅರ್ಜಿಯೊಂದನ್ನು ಸಲ್ಲಿಸಿದ್ದಾನೆ. ಏಕಾಂತ ಸೆರೆವಾಸ ಸಾವಿಗಿಂತಲೂ ಭಯಾನಕವಾದುದೆಂದು ಅವನು ಹೇಳಿದ್ದಾನೆ.

ಸುಮಾರು ನಾಲ್ಕು ವರ್ಷಗಳಿಂದ ಕೇಂದ್ರ ಸರಕಾರದ ಬಳಿ ಬಾಕಿಯಿರುವ ತನ್ನ ದಯಾ ಭಿಕ್ಷೆ ಅರ್ಜಿಯ ತುರ್ತು ವಿಲೇವಾರಿಗೆ ಆಗ್ರಹಿಸಿ ಅಫ್ಝಲ್ ಕಳೆದ ಮಾರ್ಚ್ನಲ್ಲಿ ಅರ್ಜಿ ಸಲ್ಲಿಸಿದ್ದಾನೆಂದು ಆತನ ವಕೀಲ ಎನ್.ಡಿ. ಪಂಚೋಲಿ ತಿಳಿಸಿದ್ದಾರೆ.

ಕಳೆದವಾರ ತಿಹಾರ್ ಬಂದಿಖಾನೆಯಲ್ಲಿ ತಾನು ಅಫ್ಝಲ್ನನ್ನು ಭೇಟಿಯಾಗಿದ್ದ ವೇಳೆ, ಆತ ತನ್ನ ಈಗಿನ ಸ್ಥಿತಿ ಮರಣಕ್ಕಿಂತಲೂ ಭೀಕರವಾದುದೆಂದು ಅಭಿಪ್ರಾಯಿಸಿ ದನೆಂದು ಅವನು ಹೇಳಿದ್ದಾರೆ.
ಏಕಾಂತ ಸೆರೆವಾಸ ತನಗೆ ಸಾಕೋಸಾಕಾಗಿದೆ.

ತನ್ನ ದಯಾ ಭಿಕ್ಷೆಯ ಬಗ್ಗೆ ನಿರ್ಧಾರ ಕೈಗೊಳ್ಳುವಲ್ಲಿನ ವಿಳಂಬದಿಂದಲೂ ತಾನು ಹತಾಶನಾಗಿದ್ದೇನೆಂದು ಅಫ್ಝಲ್ ಅಲವತ್ತುಕೊಂಡನೆಂದು ಪಂಚೋಲಿ ತಿಳಿಸಿದ್ದಾರೆ.

ತನಗೆ ಮರಣದಂಡನೆ ವಿಧಿಸಲಾಗಿದೆಯೇ ಹೊರತು ಏಕಾಂತ ಸೆರೆವಾಸವಲ್ಲ. ನಿರ್ಧಾರ ವಿಳಂಬದಿಂದ ತನಗೆ ಸಹಾಯವಾಗದು. ಕ್ಷಮಾದಾನ ಅರ್ಜಿಯ ಬಗ್ಗೆ ತಕ್ಷಣ ನಿರ್ಧಾರ ಕೈಗೊಳ್ಳಬೇಕೆಂದು ಆತ ವಿನಂತಿಸಿದ್ದಾನೆಂದು ಅವರು ಹೇಳಿದ್ದಾರೆ.