ಜಾತಿ ಆಧಾರಿತ ಜನಗಣತಿ: ನಿರ್ಧಾರಕ್ಕೆ ಸಚಿವ ಮಂಡಳಿ

ಹೊಸದಿಲ್ಲಿ, ಮೇ 26: ಜಾತಿ ಆಧಾರಿತ ಜನಗಣತಿಯ ಬಗ್ಗೆ ಏಕಾಭಿಪ್ರಾಯ ಬಲಗೊಳ್ಳುತ್ತಿದ್ದು, ಅದನ್ನು ನಡೆಸಬೇಕೇ ಬೇಡವೇ ಎಂಬ ವಿವಾದದ ಕುರಿತು ನಿರ್ಧರಿಸಲು ಸಚಿವ ಮಂಡಳಿಯೊಂದರ ರಚನೆಗೆ ಕೇಂದ್ರ ಸರಕಾರ ನಿರ್ಧರಿಸಿದೆ.

ಪ್ರಧಾನಿ ಮನಮೋಹನ ಸಿಂಗರ ಅಧ್ಯಕ್ಷತೆಯಲ್ಲಿ ನಡೆದ ಸಂಪುಟ ಸಭೆಯೊಂದರಲ್ಲಿ ಈ ಬಗ್ಗೆ ಚರ್ಚೆ ನಡೆದ ವೇಳೆ ಸಚಿವರೊಳಗೆಯೇ ಎರಡು ಗುಂಪುಗಳಾದವೆಂದು ಮೂಲಗಳು ತಿಳಿಸಿವೆ.

ಇದರಿಂದಾಗಿ ಜಾತಿ ಆಧಾರಿತ ಜನಗಣತಿಯ ವಿವಾದದ ಬಗ್ಗೆ ನಿರ್ಧರಿಸಲು ಸಚಿವ ಮಂಡಳಿ ಯೊಂದನ್ನು ರಚಿಸುವ ನಿರ್ಧಾರಕ್ಕೆ ಸಭೆಯು ಬಂದಿದ್ದು, ಬಹುತೇಕ ವಿತ್ತ ಸಚಿವ ಪ್ರಣವ್ ಮುಖರ್ಜಿಯವರ ನೇತೃತ್ವದ ಈ ಸಮಿತಿ ತನ್ನ ಅಭಿಪ್ರಾಯ ಮಂಡಿಸಲಿದೆಯೆಂದು ಅವು ಹೇಳಿವೆ.

ಮೇ 4ರಂದು ನಡೆದ ಸಂಪುಟ ಸಭೆಯೊಂದರಲ್ಲಿ ಜಾತಿ ಜನ ಗಣತಿಯ ಕುರಿತಾಗಿ ಅಭಿಪ್ರಾಯ ಭೇದ ಮೂಡಿಬಂದಿತ್ತು. ಕಾನೂನು ಸಚಿವ ಎಂ. ವೀರಪ್ಪ ಮೊಯ್ಲಿ ಸಹಿತ ಕೆಲವು ಸಚಿವರು ಜಾತಿ ಜನಗಣತಿ ನಡೆಯಬೇಕೆಂದು ವಾದಿಸಿದ್ದರೆ, ಗೃಹ ಸಚಿವ ಪಿ. ಚಿದಂಬರಂ ಅದನ್ನು ವಿರೋಧಿಸಿದ್ದರು.