ಮಂಗಳೂರು ದುರಂತ : ಅಸ್ವಸ್ಥ ಪತಿಯ ಆರೈಕೆಗೆ ಬರುತ್ತಿದ್ದ ಪತ್ನಿಯನ್ನು ಕರೆದೊಯ್ದ ಜವರಾಯ

ಉಡುಪಿ, ಮೇ 25: ತೀವ್ರ ಅಸ್ವಸ್ಥಗೊಂಡು ಗಂಭೀರ ಸ್ಥಿತಿಯಲ್ಲಿದ್ದ ತನ್ನ ಪತಿಯ ಆರೈಕೆ ಮಾಡಲು ದುಬೈನಿಂದ ಬಂದ ಪತ್ನಿಯನ್ನು ತನ್ನೂರಿನ ನೆಲವನ್ನು ಮುಟ್ಟುವ ಮೊದಲೇ ಜವರಾಯ ಹೊತ್ತೊಯ್ದ.
ಇಲ್ಲಿಗೆ ಸಮೀಪದ ಕೊಳಲಗಿರಿಯ ಹಿಲ್ಡಾ ಡಿ ಸೋಜ (49)ರ ದುರಂತ ಅಂತ್ಯ, ಮಣಿಪಾಲದ ಕೆಎಂಸಿ ಆಸ್ಪತ್ರೆಯ ತೀವ್ರ ನಿಗಾ ವಿಭಾಗದಲ್ಲಿರುವ ಅವರ ಪತಿ ಫೆಲಿಕ್ಸ್ ವೇಗಸ್‌ರಿಗೆ ಇನ್ನೂ ತಿಳಿದಿಲ್ಲ.
ಕೊಳಲಗಿರಿಯಿಂದ ಕೆಲಸಕ್ಕೆಂದು ದುಬೈಗೆ ತೆರಳಿದ್ದ ಹಿಲ್ಡಾ, ಅಲ್ಲೇ ನೌಕರಿ ಯಲ್ಲಿದ್ದ ಮೂಲತ: ಮಂಗಳೂರಿನವರಾದ ಫೆಲಿಕ್ಸ್ ವೇಗಸ್‌ರನ್ನು ಪ್ರೀತಿಸಿ ದುಬೈನ ಸೈಂಟ್ ಮೇರಿಸ್ ಚರ್ಚ್‌ನಲ್ಲಿ ಮದುವೆಯಾಗಿದ್ದರು. ಗಂಡ-ಹೆಂಡತಿ ಇಬ್ಬರೂ ದುಡಿದು ಹಿಲ್ಡಾರ ತಾಯಿ ಮನೆಯ ಪಕ್ಕದಲ್ಲೇ ಮನೆಯೊಂದನ್ನು ನಿರ್ಮಿಸಿದ್ದರು.
ಆರು ತಿಂಗಳ ಹಿಂದೆ ಅಸ್ವಸ್ಥರಾದ ಫೆಲಿಕ್ಸ್ ಚಿಕಿತ್ಸೆಗೆಂದು ಊರಿಗೆ ಬಂದಿದ್ದರು. ಮಣಿಪಾಲದ ಕೆಎಂಸಿಯಲ್ಲಿ ಚಿಕಿತ್ಸೆ ಪಡೆದಿದ್ದ ಅವರು ಕೆಲ ಸಮಯದ ಹಿಂದೆ ಮನೆಗೆ ಮರಳಿದ್ದರು. ಗಂಡನ ಆರೈಕೆಗಾಗಿ ತಿಂಗಳಿಗೂ ಅಧಿಕ ಕಾಲ ಕೊಳಲಗಿರಿಯಲ್ಲೇ ಇದ್ದ ಹಿಲ್ಡಾ, ಕಳೆದ ಶುಕ್ರವಾರವಷ್ಟೇ (ಮೇ14) ಚಿಕಿತ್ಸೆಗೆ ಇನ್ನಷ್ಟು ಹಣ ಹೊಂದಿಸಲು ದುಬೈಗೆ ಮರಳಿದ್ದರು.
ಆದರೆ ತಾನೊಂದು ಬಗೆದರೆ ವಿಧಿ ಇನ್ನೊಂದು ಬಗೆಯಿತು ಎಂಬಂತೆ, ಹಿಲ್ಡಾ ಕೊಲ್ಲಿಗೆ ಮರಳುತ್ತಿದ್ದಂತೆಯೇ ಫೆಲಿಕ್ಸ್‌ರ ಆರೋಗ್ಯ ಬಿಗಡಾಯಿಸಿ, ತೀವ್ರಗೊಂಡ ಪಿತ್ತಜನಕಾಂಗದ ಕಾಯಿಲೆಗಾಗಿ ಅವರನ್ನು ಮಣಿಪಾಲದ ಆಸ್ಪತ್ರೆಗೆ ದಾಖಲಿಸಿ, ಹಿಲ್ಡಾರಿಗೆ ತಿಳಿಸಲಾಯಿತು.
ಇದರಿಂದ ಒಂದೇ ವಾರದಲ್ಲಿ ಮತ್ತೆ ಊರಿಗೆ ಮರಳುವ ಅನಿವಾರ್ಯತೆ ಹಿಲ್ಡಾರಿಗೆ ಎದುರಾಯಿತು. ಊರಿಗೆ ಟಿಕೇಟನ್ನು ಸಹ ಕಾದಿರಿಸದೇ, ನೇರವಾಗಿ ವಿಮಾನ ನಿಲ್ದಾಣಕ್ಕೆ ಬಂದು ಕೌಂಟರಿನಲ್ಲೇ ಟಿಕೇಟು ಪಡೆದು, ಗಂಡನನ್ನು ಆದಷ್ಟು ಬೇಗ ಸೇರುವ ತವಕದಿಂದ ಆಕೆ ವಿಮಾನವನ್ನೇರಿದ್ದರು. ಆದರೆ ವಿಮಾನ ಆಕೆಯನ್ನು ಗಮ್ಯಸ್ಥಾನ ತಲುಪಿಸುವ ಬದಲು ಇನ್ನೆಂದೂ ಮರಳದ ಕಡೆಗೆ ತಲುಪಿಸಿದೆ.
ಹೆಂಡತಿ ಬರವನ್ನು ಎದುರು ನೋಡುತ್ತಾ ಫೆಲಿಕ್ಸ್ ಆಸ್ಪತ್ರೆಯ ಹಾಸಿಗೆಯಲ್ಲಿ ಮಲಗಿದ್ದಾರೆ. ಆದರೆ ಹಿಲ್ಡಾ ಮೇ 22ರ ವಿಮಾನ ದುರಂತದಲ್ಲಿ ಮೃತಪಟ್ಟ ವಿಷಯ ಅವರಿಗೆ ಇನ್ನೂ ಗೊತ್ತಾಗಿಲ್ಲ ಎಂದು ಹಿಲ್ಡಾರ ಅಣ್ಣ ಫ್ರೆಡ್ರಿಕ್ಸ್ ಡಿ ಸೋಜ ಹಾಗೂ ಅತ್ತಿಗೆ ಹೇಳುತ್ತಾರೆ.
ಹಿಲ್ಡಾರ ಮೃತದೇಹದ ಅಂತ್ಯಸಂಸ್ಕಾರ ಕಳೆದ ರವಿವಾರವೆ ಕೊಳಲಗಿರಿ ಚರ್ಚ್‌ನಲ್ಲಿ ನಡೆದಿದೆ. ಹಿಲ್ಡಾರ ಮನೆಗೆ ಇಂದು ಅಪರಾಹ್ಣ ಕೇಂದ್ರ ಸಚಿವ ಕೆ.ಎಚ್.ಮುನಿಯಪ್ಪ ಭೇಟಿ ನೀಡಿ ಮನೆಯವರಿಗೆ ಸಾಂತ್ವನ ಹೇಳಿದರು.